Eri unidades especializadas rech ri Wokajil Ajchajin Tinamit (PNC) e’are e’ajq’atenel ri k’ayin awan kunb’alil pa taq ri tinamit. Pa domingo 8 rech junio, eri reqa’lenel ri Subdirección General rech Análisis rech Información Antinarcótica (SGAIA) rech ri PNC, pa komonchak kuk’ ri q’atol tzij, xkiriqo xuquje’ xkiporoj k’i taq uperajil awan kunb’al rech marihuana tikom pa San Marcos ri’.
Eri reqa’lenel kuk’ ri q’atol tzij xkib’an katzukuxik pa le caserío Aguas Calientes rech ri aldea Queca, uq’ab’ tinamit rech Sipacapa, chi la’ k’ut xkiporoj wi 1,250 chi ichaj rech awan kunb’al tikom, eri rajil are Q468 mil ri’. Eri komochak are xub’an upatan ri’ rech xb’antaj kowonem xriqitajik ri peraj chi tiko’nib’al awan kunb’al ri’.
Pa jun chik puqtzukunem xb’an kumal reqa’lenel ri SGAIA pa taq ri k’ache’laj rech Las Cruces, Petén, chi la’ xriq wi xporox wi 22,572 chi raqan ichaj rech marihuana ri’ tikom. Eri rajil ri’ are Q8.4 millones ri’. Eri reqa’lenel ajq’atenel awam jastaq kunb’al ri’ e rech ri delegación Mundo Maya ri’ ri xaq katajin che kaq’atexik nik’aj molaj b’anol taq k’ax pa tinamit.
Sib’alaj k’ax xkitij ri e’ajchajinelab’ chi paq’ij chaq’ab’ xuquej’ pa nimaq’ab’ ri’ xkitaqij uriqik xuquje’ uporoxik ri awan kunb’al tiko’n ri’, chi la’ k’ut pa taq le juyub’ ri k’ax kariqitaj wiri’.
Utz taq tzukunem q’atenik b’anom
Pa le puqtzukunem k’ate xb’an kanoq e k’o keb’ winaqib’ xechapik ri keqam b’i USD $184 mil, qaraj k’o Q1.4 millones, pa Chisec, Alta Verapaz ri’. Eri nik’aj winaq xechapik e’are xeriqitaj loq kumal reqa’lenel ri SGAIA, are chi’ e b’enaq chi rij jun kejach’ich’. Are chi’ xechapik, eri nik’aj winaq ri’ xkiq’alisaj taj jas/su xkik’am wi loq ri pwaq ri’. Rumal ri’, xek’am b’i pa q’atb’al tzij rech kaq’alajisax uwach upetib’al ri pwaq keqam. Eri nik’aj winaq xechapik e’are ri’ a Juan “N” 46 ujunab’ xuquje’ a Ever “N”, 29 ujunab’.
Pa le 10 rech junio, pa komonchak tzukunem xb’an kumal ri SGAIA, Ri Wokaj Chajin Amaq’ Iximulew kuk’ ri q’atol tzij, k’o 100 mil raqan ichaj rech coca xriqitaj ri’. Eri peraj taq tiko’nib’al are xriq pa taq ri k’ache’laj rech ri aldea Esquipulas Mollejón, San Luis Petén., eri tzukunem xb’anik are rech kaq’atexik ri k’ayin awam jastaq kunb’al ri’.
Eri rajil taq ri peraj riqon awan kunb’al tikom qaraj k’o jun Q1 millón ri’.