Rumal pa aninaqil ri’ eri reqa’lenelab’ ri Comisaría rech ri Wokajil Ajchajin Tinamit (PNC) xb’antaj kowonem xkichap loq e kajib’ chi uwinaqil ri Pandilla rech ri Barrio 18, are chi’ xk’is ri koqataxik pa le q’a’mb’e ub’i’ La Prosperidad, rech de El Búcaro, zona 12 rech Villa Nueva, Guatemala ri’.
Eri xchapatajik are ri’ a 24 ujunab’, ukojom ub’i’aj “Chavo”, are kab’ixik xub’an ri junn k’aqanik pa le wokja ri’. Are chi’ xerilo xe’opan ri e’ajchajin tinamit, xraj ri are xkanimajik chi rij jun kejach’ich’. Rumal ri’ xeqataxik, xtzaq chi rij ri jun ukejach’ich’ b’enaq wiri’, xto’ k’ut kumal nik’aj chik pandilleros e rachi’l ri e b’enaq pa jun ch’ich’, xuquje’ ri xechapik chi la’ k’ut kab’ixik.
Eri kib’i’ nik’aj chik xechapatajik, e are k’ut a Wilber N, 35 ujunab’, ri ub’insam b’i ri jun ch’ich’; ri al Irma N, 33 ujunab’, xuquje’ ri jun ala ukojom ub’i’aj “El Chino”, ri xk’am b’i pa jun q’atb’al tzij rech ke’uchomaj e’ab’om, e’alitom ri’ ri kakinimaj ta tzij. Are chi’ xchap ri jun a “Chavo” xriq jun k’aqb’al q’aq’, jun tolva, waqxaqib’ ub’aq’ k’aqb’al q’aq’ ri utz kakojik. Eri nik’aj winaq e b’anol k’ax ri’ xek’am b’i pa taq ri q’atb’al tzij rech kechomaxik chi la’ k’ut.
Ruk’ kichapik nik’aj winaq ri’, eri wokaji ajchajin tinamit e’are wari’ xkichap loq e 125 chi winaqil ri’ pa le k’isb’al taq keb’ q’ij xoq’ax ri’ pa tinamit. Pa konojel ri xechapik, e k’o 91 ketajin pa b’anoj k’ax xeriqitaj ri’ xuquje’ e k’o 34 xa’ xtaq kichapik rumal taq q’atb’al tzij. Xuquje’ k’o wuqlajuj chi k’aqb’al q’aq’ maj uwujil xriqitajik uquje’ e k’o job’ ch’ich’ keb’insaxik e elaq’am b’i xeriqitaj ri’.
Eri tob’anem chi kuwach ri wokajil ajchajin tinaimit kuk’ ri winaqilab’ pa tinamit are k’ut qas xub’an nim upatanib’al rech xb’antaj kowonem rech xq’atataj ri’ ri e’ajb’anol taq k’ax. Rumal ri’ k’o le ch’awb’alib’al 110 rech ri PNC, le 1531 rech ri Centro Anticorrupción Policial, xuquje’ le 1561 rech Crime Stoppers ya’tal ri’ rech wexa’ k’o b’anoj k’ax, rech chi la’ kakiya wi loq ub’ixik ri winaqil ri’.