Pa aninaqil k’ut eri reqa’lenel ri Comisaría 31 rech ri Wokajil Ajchajil Tinamit (PNC) xkichap e waqib’ chi winaqil kab’ixik xkib’an jun k’aqanik pa lunes 25 rech septiembre pa le kilómetro 85 rech ri nimab’e kab’e pa Puerto Quetzal, Escuintla ri’.
Pa le kilómetro 88 rech ri nimab’e ri’, xchap wi loq a Rolando Antonio Sosa Cano, 36 ujunab’, alias “El Cadena”, a Alvaro José Sosa Cano, 41 ujunab’ xuquje’ al Emmely Daniela de la Cruz, 18 ujunab’, ub’inisam b’i jun camioneta ruk’ ri placas rech circulación P-810JLV kik’amom b’i oxib’ chi k’aqb’al ri’ xuquje’ keb’ chik alaj k’aqb’al.
Pa le kilómetro 65 rech chi la’ k’ut, eri ajchajil tinamit xkiq’atij jun pick up ruk’ ri placas circulación P-845JJP, pa le eb’enaq wi a Javier Orlando Quezada García, 28 ujunab’, ri nicaragüense Jeancarlos Cano Chavarría, 23 ujunab’ xuquje’ a Cristopher Geovani Flores Trinidad, 18 ujunab’ ri’, ri xek’am b’i pa le Hospital Nacional rech Escuintla rumal sokom che k’aqb’al ri’. Wa’ ch’ich’ ri’ are uchararim jun kara’t ri reqam b’i jun kejach’ich’ kajib’ sutut raqan.
Ri xk’ulmataj ri’
Pa le uterenb’exik ri jun k’ax ri’, eri ajchajil tinamit xkitz’apij ri nimab’e ri’ rech xkiq’atij nik’aj ajb’anol k’ax ri’, rumal ri’ xb’antaj kowonem xeq’atexik pa jalajoj taq ri’.
Pa le kaq’atexik xriqitajik oxib’ chi k’aqb’alil, oxib’ alaj k’aqb’al, 422 ub’aq’ k’aqb’al utz kakojik, jun chaleco antibalas xuquje’ 23 tolvas ri’.
Sib’alaj katajin ri tzukno’jchak chi rij ri jun b’anoj k’ax ri’ rech kaq’alajisaxik ri k’ax xb’an pa le nimab’e ri’ xuquje’ rech kilik jawchi’ upetib’al ri k’aqb’alil xeriqitajik.