Pa le uniimaq’ij ri ujuk’al uwuq ujunab’ xutz’aqatisaj ri Wokajil Ajchajil Tinamit (PNC) xkib’an jun maltyoxinem, pa reqele’n ri Capellán Policial, Francisco Pérez, xuquje’ rumal ri Pastor César Ayala, ajk’amal b’e rech ri Alianza Evangélica rech Iximulew. Eri ch’awem kumal xb’an pa le b’elejeb’ q’ij rech julio pa le Dirección General rech ri PNC, k’o pa le zona 1 rech nimatinamit.
Eri K’amal B’e rech ri PNC, David Custodio Boteo, xub’ij che we ujuk’al uwuq ujunab’ chik ri wokajil chajin tinamit man are ta rech kajach tane’ jastaq ch’akob’al, xane’ are rech uk’exik uwach ri chakunem kab’an pa komon winaq rech ya’tal jun utzilaj chuwe’q kab’ij xuquje’ rech e kek’oji e utzilaj taq winaqilal. Xuquje’ xub’ij chi ke ri wokaj ajchajil tinamit, chaterne’j b’a’ ub’anik jun uch’ob’ik jas le utz jas le utz taj kib’anom xuquje’ ruk’ pa usaqil utob’anik le nim Qatat pa le kaj.
“Xa’ b’a’ kiwaj kinmaltyoxij chiwe achijab’, ixoqib’ chib’ana b’a’ utz che ri loq’alaj wokajilal ri’, eri qachak kaqab’an ronojel q’ij are la’ jun qeqele’nik kuk’ ri winaqil xuquje’ ri b’anoj utzilem chi ke ri winaqilal. Pane’ b’a’ are tijowchuq’ab’ tijowk’ax, kaqaterne’j b’a’ ub’anik ri qachak, ruk’ ronojel qanima’ xuquje’ ruk’ uq’ab’ uchuq’ab’ ri Qatat k’o pa le Kaj”, xcha’ ri K’amal B’e, Custodio Boteo.
Eri Capellán Pérez xub’an jun ch’awem ruk’ ri Ajaw pa le Kaj rech xumaltyoxij ri ujuk’al uwuq ujunab’ kutz’aqatisaj ri wokajil chajin tinamit. Sib’alaj xub’ij chi k’o upatanib’al ri chak kib’anom ri wokajil chajin tinamit ri’ pa le kachajixik ri winaqil, ri jastaq meb’il pa tinamit aj iximulew.
Rumal k’u ri’, eri Pastor Ayala xub’ij chi k’o nim upatan che ri jujun taq reqa’lenel chajin tinamit kakiya kib’ kakiya’o ri kichak pa uq’ab’ ri Ajaw chi Kaj. Xuquje’ xuya uq’ijol ri kichak, rumal ruk’ ronojel kanima’ ri jujun achijab’ xuquje’ ixoqib’ e reqa’lenel ri PNC, kakib’an ri chajinem winaqilal xuquje’ ri chajinem rulewal tinamit ri’.