Pa le ropanik ri 29.º ujunab’ kutz’aqatisaj ri Wokajil Ajchajin Tinamit (PNC), paq’ij domingo ri’ xb’an ri cholb’inem rumal ri taqawokajil ri’ le xq’axik pa le Paseo La Sexta ri xk’is chi uwach le Nimaja Rachoch Amaq’ pa uk’u’x nimatinamit, are uwach taq ri b’anow unimaq’ij rumal xa’ jub’ik chik karaj kopan pa juk’al lajuj ujunab’ ri wokaj chajin tinamit aj iximulew ri’.
Pa le riqon ib’ ri’ xkimol wi kib’ ri jalajoj wi kiwach taq ri e sak’ajil taq eqa’lenelab’ ri wokaj chajin tinamit, ri e’ajtijoxel rech ri Tijob’al rech Reta’mab’al Chajin Tinamit, ri rajtaqo’ninelab’ ri Academia rech Wokajil Chajin Tinamit rech Honduras, kuk’ ri Wokaj Ajchajin Amaq’ Iximulew, ruk’ ri Taqawokaj rech Japache’ Tz’apib’al, kuk’ taq ri rajchajinelab’ xuquje’ ri banda marcial rech ri Colegio San José rech ri Infantes, pa jun b’anow kemonchak ri’, ruk’ ri nimantzij no’jtijojnem xuquje’ ri reqale’nchak ruk’ ri chajinem pa amaq’ tinamit.
Pa le b’anow ulab’an tzij, le k’amal b’e Amaq’, Bernardo Arévalo, sib’alaj xutzijon chi rij taq ri chak b’anom pa le ya’ik uchuq’ab’ ri Wokajil Ajchajin Tinamit. “K’o nim upatanib’al ri chak b’anom, ri k’o na karaj kab’anik. Kojtajin k’ut che ub’anik ri rajawaxik rech chajinem pa ronojel taq ri tinamit rech Iximulew”, xcha’.
Rumal k’u ri’, eri ministro rech Gobernación, Marco Antonio Villeda, xuya uq’ij ri kichak tajin kakib’an ri ajchajinel pa tinamit rech kakitzuqu ri kachalal ri’ ruk’ ri b’anow chak pa tinamit ri’”. “Kaqaj uj kojchakunik pa le PNC ri k’o nim utijoxik ub’anom, ri qas utz, ri qas saq uwach ub’anikil xuquje’ ri k’o qas chikinaqaj ri winaq tinamit”, xcha’.
Eri cholb’ienm ri’ are xkilo uwach le viceministros rech ri taqawokajnem, ri q’atb’al tzij rech ri PNC nab’eyajnaq chi kiwach ri k’amal b’e David Custodio Boteo, kuk’ ri jupuq chi ajtaqo’ninelb’ kuk’ ri e sik’im pa le b’anowem ri’. Are uwach ri nimaq’ij na’tib’al ri xtatb’enik wi le Alaj Ala K’amal b’e rech ri Wokaj Chajin Tinamit, a Carlos Saúl Bocanegra Morales, pa jun b’anowem k’o nim retalil ri kuwa’lijsaj uwach ri no’jk’aslemal, ri k’amow b’e ri reqale’nchak ruk’ ri kachajixik ri winaqilal pa tinamit.
Pa le kasolixik xb’an chi ke ri wokaj sak’ajil ajchajinelab’, eri subcomisario rech PNC, Jorge Aguilar Chinchilla xub’an utzijob’exik jub’i’ chi rij taq ucholajib’al ri’ rech sib’alaj xub’an utzijoxik ri chak b’anom kumal ri wokaj chajin tinamit aj iximulew. Eri jalajoj kiwach taq ri wokajil ri’ xkib’an uk’utik ri chak kena’w che ub’anik ruk’ taq ri puqtzukunem kakib’ano are chi’ kakiq’atij k’ax xuquje’ ri e’ajb’anol ri k’ax ri’. Xuquje’ eri xik’ach’ich’ rech ri Unidad Aérea rech ri Ministerio rech Gobernación xkib’an ri kirapapem pa kaqiq’ cho ri k’ax pa le nim ilonem ri’.
Eri nimaq’ij rumal xutz’aqatisaj 29.º ujunab’ chik ri taqawokajnem ri’ ruk’ xq’alajisax ri nimachak tajin rumal ri Wokajil Ajchajin Tinamit ruk’ ri ya’ik uchuq’ab’ ri uchak upatan, rech k’ak’ ub’anik taq ri toq’inik b’anow chak ri’ xuquje’ rech ri tojb’al ri uchak kub’an ri jun ajno’jchakunel pa le chajinem winaqilal pa tinamit aj iximulew ri’.