Eri jupuq reqa’lenelab’ ri Comando Antisecuestros rech ri Wokajil Ajchajin Tinamit (PNC) k’o jun alaj ali b’elejeb’ ujunab’, utz uwach xkesaj pa kaq’ab’ nik’aj b’anol k’ax pa le alea Buena Vista, zona rech Chimaltenango ri’. Rumal b’a’ pa aninaqil xya’taj ub’ixik kumal ri unan utat ri’ xeb’e ri jupuq ajchajinelab’ che resaxik ri alaj ri’ pa kaq’ab’ nik’aj b’anol k’ax.
Eri nik’aj winaq xechap ri’ e’are k’ut a Germán Servando Pérez Pérez, 31 ujunab’, xuquje’ al Helen Andrea Mishell Raquec Jocholá, 25 ujunab’, kab’ixik e’are nik’aj winaq ri’ sib’alaj xkitoq’ij Q2 millones chi pwaqil chi rij ri alaj ali, rech kakitzoqopij loq. Eri alaj ali ri’ k’ax ri xriqitaj wi loq, yutum uq’ab’ yutum raqan. Are chi’ xesax pa k’ax ri’, xya ub’ixik kuk’ ri q’atb’al tzij rech kakib’an ri nim ilonem chi re rech sib’alaj kachajixik.
Eri Ministro rech Gobernación, Francisco Jiménez, pa le uwachwuj pa kaqiq’ ub’i’ X, xuya uq’ij kichak kakib’an ri Comando Antisecuestros rech ri xkesaj ri alaj ali pa k’ax ri’ xuquje’ rumal xkichap loq nik’aj e’ajb’anol ri k’ax ri’. Xuquje’, sib’alaj xkib’ij chi ke ri kinan kitat che e k’o kuk’ xuquje’ xkikajmak ri kilik rumal pa aninaqil xkiya loq ub’ixik. “Eri b’anoj chak ri’ utz xb’an chech pa le tob’anem ri’”, xcha’.
Eri q’atb’al tzij xkib’ij, eri xeleq’ax ri alaj ali ri’ pa le 15 rech septiembre rech pa junab’ ri’, pa le aldea Los Aldea Los Llanos, Zaragoza, Chimaltenango ri’. Te k’uri’, jun chi ke nik’aj b’anol k’ax ri’ xch’aw apan kuk’ ri unan uta ri ala ali ri’ xuquje’ xutoq’ij chom pwaq chi rij rech kutzoqopij loq k’aslik.
Are chi’ xb’antaj ri utzukuxik uwach ri’, eri jupuq reqa’lenelab’ ri Comando Antisecuestros xekowonik xkiriqo, xuquje’ xkesaj loq pa k’ax ri alaj ali man k’ot pwaq b’a’ xkitoj chi rij tane’. Rumal k’u ri’ eri unan utat ri alaj ali xkich’ob’ kuwach nik’aj b’anol k’ax ri’ e’are k’ut a Pérez Pérez are b’a jun achi xchakun kuk’. Eri tzukunem chi rij ri’ are katerne’x ub’anik ri’ rech ketzukuxik we e k’o nik’aj chik winaq pa le b’anoj ri k’ax ri’.