Qas k’o nimalaj kipatan le Grupo Especial rech Q’atenik taq Extorsiones (GECE) ri’ le uq’ab’il le Wokajil Ajchajil Tinamit (PNC) ri’ pa le ya’olchajinem winaqil pa tinamit rech Xe’laju’ ri’. K’a kamik ri’, we le jun puq ajeqa’lenel chajinem ri’ e’are kakib’an le puqchajinem tzukunik kuk’ le rajchajinel le Comisaría 41, rech kakub’saxik ri chainem winaqil ri’ xuquje’ rech kaq’atexik ri e’ajb’anol k’ax pa tinamit.
Eri b’anon chajinem ri’ k’o ub’e’al ub’anik kab’an pa tinamit, che kaqan xuquje’ chi rij taq kejach’ich’ kumal e’ajchajin tinamit che ri qas kakimol wi kib’ le winaqilal, jeri’ pa taq le k’olib’al winaqil pa tinamit ri’. Xuquje’ k’o uk’olib’alil ri chajinem kab’an pa tinamit, pa taq ri k’olib’alil che ri qas kasolix wi kib’i’ kitzijol ri winaqil ri’ rech ke’lik man k’ot jun chi kech taqom uchapik loq rumal q’atb’al tzij.
Xuquje’ eri wokajil e’ajchajil tinamit xkib’an usolixik kib’i’ kitzijol ri winaqil e b’enaq chi rij taq kejach’ich’, ri e b’enaq pa taq ch’ich’, ri e b’enaq pa taq nimach’ich’ e reqam b’i winaq ri’. Eri taqim ri’ are rech kilik we man k’ot ch’ich’ e eleq’am b’i le wene’ qaraj kakoj kumal ri e’ajb’anol k’ax pa taq tinamit ri’.
Eri chajinem kumal ri e’ajchajil tinamit ri’ are la’ uwach ri b’anonem chajinik taqom ub’anik rumal le ajtaqawokajnel rech ri ya’olchajinem pa qatinamit ri’ rech uq’atexik taq ri e’ajb’anol k’ax toq’inik pwaq ri’ xuquje’ rech kanimaxik ri chajinem kitam le winaqil pa tinamit ri’.
Pa junab’ ri’, eri wokajil ajchajil tinamit ri’ xkiya utziijol che e k’o e 145 chi winaqil e’ajb’anol k’ax toq’inik pwaq ri’, e k’o uwinaqil ri pandillas xuquje’ e’ajsub’unel kakib’an ri k’ax ri’. Eri b’iw ub’ixik kumal ri winaqilal ri’ are la’ k’o nim upatanib’al ub’ixik loq pa le 110 rech ri PNC, ri k’o chi paq’ij chi chaq’ab’ ri’.