K’a te kanoq eri q’atb’al tzij rech ri Ministerio rech Gobernación (Mingob), xkiya ub’ixik ucholajil che xqaj loq pa 6% uchuq’ab’ ri b’anoj k’ax kamisanik ri’ ri xk’ulmataj pa le nab’e q’ij rech enero k’a le nab’e q’ij rech octubre rech 2023, man je ta ri’ ri xk’ulmataj pa le junab’ir kanoq, are wa’ xb’antajik rumal ri utzilaj chajinem tajin kumal ri e ajchajil tinamit.
Eri xya ub’ixik ri’ rumal ri Subdirección General rech Operaciones rech ri Wokajil Ajchajil Tinamit (PNC), pa le nab’e lajuj ik’ rech pa junab’ ri’ are chi’ xekamisax e 2 mil 182 chi winaqib’, man je ta ri’ ruk’ ri e 2 mil 318 ri xekam ri’ pa le 2022, xa’ 136 xujel rib’ ri rajilab’al rech ri xekam ri’.
Eri Ministro rech Gobernación, David Napoleón Barrientos, xuya ub’ixik che ri xb’antaj kowonem xq’atataj ri’ are rumal ri utzilaj kichak chajinem xkib’an konojel ri wokajil ajchajil tinamit, ri xeb’e xechajin pa le nimab’e rech uxo’l ja pa nimatinamit ri’ kuk’ ri ajtzukunelab’ xuquje’ ri e sak’ajil ajchajinel ri’, “are wa’ jun retalil ri uq’ab’ utz chak tajin ub’anik pa le kachajixik ri winaqilal pa nimatinamit ri’”, xcha’.
Eri nima tata’ Barrientos xuquje’ xuya utzijol ri’ k’o nim upatanib’al ri katob’anik ri winaqilal pa le b’iw ub’ixik loq, rumal k’ut sib’alaj k’o jun nim ub’ixik loq are la’ uya’m pa retalil rech tajin uq’atexik ri b’anoj k’ax ri’.
Eri nim taqawokajnel ri’ xub’ij che ri k’amq’ab’ tob’anik chi kuwach ri PNC kuk’ ri winaqilal are la’ ub’anom jun nimalaj upatanib’al pa le ya’olchajinem ri’ rech pa kub’al k’u’x joremal ri k’olem pa tinamit ri’, rumal ri’ xub’an jun nim kasik’ixik ri winaqil rech chakub’ kik’u’x b’a’ chi kij ri q’atb’al tzij xuquje’ rech chakib’ij loq utzijol ri b’anoj k’ax kakilo kab’anik.
Rumal ri’ jachin karaj k’o kub’ij loq, kach’aw loq pa le 110 rech ri PNC, pa le 1561 rech Crime Stoppers xuquje’ pa le 1574 rech antiextorsión.