Chi jujunal ri ixoqib’ che ri kechakun pa le Ministerio rech Gobernación (MINGOB) kuk’ ri kechakun pa taq uq’ab’il ri taqawokajil ri’ loq’ ri kichak kakib’an ri’, ruk’ ajeqa’lenem, pa utzilal xuquje’ pa reqale’xik kanimaxik ri winaqilal pa utzilem, rech kakipatanij ri winaqilal xuquje’ rech kakiwok uwach ri wokaj winaqilal pa kub’alil, pa junamamil xuquje’ pa suk’ilal chi ke konojel ri’.
Rech kaloq’axik uwach ri kichak pa le loq’ ilob’anem pa le uq’ijol ri Kanimaq’ij Taq ri Ixoqib’ pa Uwachulew xya ub’ixik rech kajaq uwach ri Espacio Amigo rech Lactancia Materna (EALM) pa le Palacio rech Gobernación ri’. Ruk’ wari’, kakub’isax ub’anik pa utzilal ri kipatanexik ri ixoqib’ pa taq le q’ij ke’alanik ketu’tisanik xuquje’ kanimax pa juntir ri ya’tal chi ke pa taq le q’ij ri’, rech man k’ot kutzil kaqaj pa kik’aslemalil ajeqa’lemal ri’.
Eri ministro rech Gobernación, Marco Antonio Villeda, xuk’am ub’e ub’anik ri na’tib’al Kiq’ijol ri Ixoqib’ pa Iximulew xuquje’ rech kanimaxik ri ya’tal ri q’ij chi ke ri’ pa le taqawokaj ri’, kaya kiq’ijol ri ixoqib’ ri’ xuquje’ are kab’an utz uloq’axik ri kichak kakib’ano.
“Eri kipatanexik ri ixoqib’ ri’ man xaq ta ri’ pa taq le q’ij k’o pa le cholq’ij, rajawaxik b’a’ kanimaxik ub’antajil ri’ pa taqawokaj ri’, pa le ya’tal chi ke, pa le k’amow b’e ri’ xuquje’ pa le utz kilik ri’. Jeri’ pa le ajawam uch’ob’ik ri’ che ri jun ixoq man kub’an ta k’i taq kuresaj wi rib’ rech kub’an tane’ ronojel ri katoq’axik chi rij pa le wokaj winaqilal ri’”, xcha’ ri q’atol tzij rech Gobernación.
Sib’alaj xub’ij chi k’o nim upatanib’al rech katerne’x uwokik uwach le amaq’ tinamit ri maj ub’anik k’ax chi ke ri ixoqib’ xuquje’ rech ya’tal chi ke ri jikomal chi ke. Xuquje’ sib’alaj xub’ij chi k’o nim rajawaxik rech kab’an wi ri kato’ik rech kechomaxik, rech pa ajeqa’lenem kechakunik xuquje’ rech man kakiwajo ta kib’ are chi’ ke’alanik. Eri ch’ob’otal chak ri’ are la’ kab’anik ruk’ ri utob’anik ri Fondo rech ri Consolidación de la Paz ri kuya kipwaqil rech kechakunik ri Agenda rech Ixoqib’, Joremal xuquje’ Chajinem pa Iximulew.
“Are chi’ le wokajil ke’uchajij ri ixoqib’ kuya kichuq’ab’; are chi’ kanimax le q’ij ke’alanik rech keloq’axik pa le kik’aslemalil; xuquje’ we kab’an loq’ utzil chi ke ri’ are la’ kub’an loq’ che ri taqawokaj ri’; rech kek’oji pa le k’ak’ q’ijol xuquje’ pa junamamil”, xcha’ le tat Villeda.
Pa le ilob’anem ri’ xk’oji ri ministra rech Chakunem xuquje’ Previsión Social, Miriam Roquel ri’; ri viceministra rech Prevención, Mayda de León ri’ kuk’ rajchomanelab’ ri taqawokaj rech taq amaq’ pa uwachulew.
Eri ub’anik ri Política Institucional sobre Espacios Amigos rech ri Lactancia Materna ri’ are kub’an ri’ rech katerne’x ub’anik ri taqanem pa tinamit rech kukub’isaj ub’anik ri utz ilonem, ri utz kilik xuquje’ rech katerne’x ub’anik utz chi ke pa le kichak pa taq le q’ij ke’alan ri’.
Xuquje’ xepixb’axik ri e’ajchakunelab’ chi rij ri upatanib’al uloq’axik le q’ij rech alanem ri’, pa le b’anik utzijob’exik rech are wa’ kanimaxik pa taqawokaj ri’ xuquje’ rech kab’an utzil utob’ik uwach ri ya’tal chi ke ri ixoqib’ pa le ka’alanik. Xuquje’ rech kajipix uloq’axik le q’ij rech taq alanik, jacha ri taqom ub’anik, rech ya’tal kek’oji wiri’ xuquje’ rech are la’ kab’an uloq’axik pa le Taqawokaj ri’.