Eri usolixik rech xutz’ib’axik kib’i’ ri winaq e tz’apil pa rachoch japache’ pa le Centro Preventivo kech Achijab’ rech ri zona 18 are la’ uwach uchak ri Ministro rech Gobernación, Marco AntonioVilleda, rech pa b’anik pa ucholalejil ri chajinem pa wokajil japache’ pa amaq’ tinamit. Rumal ri’, eri rajchak uq’ab’ ri taqawokajil rech ri Wokajil Japache’ (SP), ruk’ katob’anik ri unidades rech ri Wokajil Ajchajin Tinamit (PNC), xkib’an jun nimalaj puqchajinem tzukunik ri xkitz’ib’aj wi ri kib’i’ kitzijol ri winaq e tz’apil pa japache’.
Xuquje’ eri e’ajpache’ xtz’ib’ax kib’i’, eri nik’aj chik unidades especializadas ruk’ katob’anik ri binomio K-9, xkib’an ri tzukunem pa japache’ tz’apib’al rech xkitzukuj wexa’ k’o ri ma utz chi’, rech xk’am b’i ri awan jastaq xriqitaj ri’ rech maj jun k’ot toq’ob’ ya’tal chi re chi’. Are chi’ kanajtib’ ub’anik ri tzukunik ri’, eri wokajil ajchajin tinamit chi kijujunal, kakinuk’u kib’i’ kitzijol ri e tz’apilik pa k’ak’ kemechakub’al, ruk’ ri kachib’al kakesaj, ri uwikaq’ab’ rech kakilo ri kimak kib’anom, rech kilik we jun chik kib’i’ kakojom xuquje’ rech qastzij b’a’ kab’an le rilik kitzijolil ri winaqil e tz’apil pa japache’.
Eri uk’amik kitzijol pa juntir are xmajtaj ub’anik pa le Rachoch Japache’ Tz’apib’al ub’i’ Centro rech Privación rech Libertad Cantel, Xe’laju’, pa le 15 rech noviembre kanoq. K’a pa waqib’ junab’ ri’, eri wokajil ajchajin tinamit e’okinaq ta chi la’ pa japache’ ri’ rumal ri’ man k’ot ri kilonem chi kij ri winaqil e tz’apil pa japache’ ri’. Rech te k’u ri’, jeri’ xb’an pa le rachoch japache’ rech Salamá, pa le Centro rech Orientación Femenino xuquje’ pa le japache’ rech Pavoncito pa Fraijanes, xuquje’ kimik pa le Sector 11 rech ri Preventivo ri’.
Xuquje’ eri tzukunik che ri xb’an ri’ are uwach ri taqom ub’anik pa le Decreto 11-2025 rech ri Taqawokaj rech Taqanib’al pa Amaq’, ub’i’ taqanem rech antipandillas, rech kaq’atexik ri molaj b’anol k’ax. Rumal ri’, eri Ministerio rech Gobernación (Mingob) pa reqale’n uchak ri SP xb’an ri tz’ib’an kib’i’ pa k’ak’ kemechakub’al ri pandilleros ri’, man k’ot jumul b’anom wari’.
Rech xya pa retalil ri ucholalejil ri’ rech maj jun k’ot b’anoj toq’ob’ chi re, eri Ministro Villeda xub’ij che ya’tal taj kek’oji ri tane’ ri tz’i’ kuk’ ri e’ajpache’, rajawaxik b’a’ ke’esax b’i chi la’ pa japache’. Man utz taj kek’oji ri tz’i’ chi la’ xuquje’ man are taj ri ub’anikil ri rachoch ri japache’ xane’ are rech ketz’apib’ chi’ ri winaqil rech kakitoj kimak.
Man k’ot jumul b’a’ b’anom wa’ xmajtaj k’ut utz’ib’axik kib’i’ ri winaq are la’ ri qas kib’i’ ri winaqil che ri e tz’apilik pa japache’ rech ri amaq’ tinamit.