Pa aninaqil ri’ xe’opan ri ajchajin tinamit rech xkichap loq e waqib’ chi pandilleros rech ri Barrio 18, ri kiwajom kib’ pa jun nimaja k’o pa le barrio El Rastro, Puerto Barrios, Izabal ri’, are chi’ xkib’an jun k’aqanik chi ke rajchak jun empresa kujach tzam chi la’ k’ut.
Ri xch’ob’ kuwach e’are k’ut a Luis N, 24 ujunab’; al Keyla N, 29 ujunab’; a Jonathan N, 19 ujunab’; a Darwin N, 18 ujunab’; a Josué N, 29 ujunab’, xuquje’ ri taqom uchapik ri’ rumal k’o elaq’ xub’an ri’. Xuquje’ k’o jun ala 17 ujunab’ xchapik ri xk’am pa jun Q’atb’al Tzij rech Ke’uchomaj e Q’apojil ri kech’u’jirik Keniman taj.
Eri a Jorge Aguilar Chinchilla, ajtzijolinel rech ri Wokajil Ajchajin Tinamit (PNC), sib’alaj xub’ij che pa aninaqil eri Grupo rech Reacción Inmediata Lobos GRIL., rech b’a’ pa aninaqil xechap loq nik’aj pandilleros ri’. Xub’ij k’ut, eri nik’aj winaq ri’ xek’am b’i pa taq Q’atb’al Tzij chi rij taq ri k’ax xikib’ano rech kechomax k’ut.
Pa le tzukunik ri’ xriqitaj ri’ kajib’ chi k’aqb’al q’aq’ ruk’ jun k’o pa suk’ulib’al ri k’aqb’al ri’, ruk’ jun rab’arik k’aqb’al xuquje’ ruk’ jun k’uqpulunk’un ri’. Te k’u ri’, eri ajchajin tinamit xkiq’axe’j pa kaq’ab’ le Instituto Nacional rech Ciencias Forenses (INACIF), chi la’ k’ut kab’an wi uq’alajisaxik uwach ri’ che ri k’ax e kojom wiri’.
Eri PNC xuya utzijol, che maj jun chi winaq k’ut xsakataj taj xuquje’ eri tzukunem q’alajisab’al uwach taq are katerne’x ub’anik ri’ rech kaq’alajisax uwach ri jun k’aqanik xb’an ri’, qaraj k’o uwach ruk’ ri jun toq’inik pwaq tajin kumal nik’aj pandilleros ri’.