Eri reqa’lenelab’ ri División Especializada rech Investigación Criminal (DEIC) ri’ uq’ab’il ri Wokajil Ajchaiin Tinamit (PNC) xkib’an k’ilaj puqtzukunem pa jalajoj taq wokja rech ri uk’u’x nimatinamit, pa le aldea Boca del Monte, Villa Canales ri’; pa San Pedro Ayampuc, xuquje’ pa Villa Nueva ri’, rech uq’atexik ri b’anoj k’aqanem pa junamamil kumal nik’aj pandilleros e’itzelalaj taq xib’ib’anel uwinaqil Barrio 18 xkib’an ri k’ax k’aqanik chi ke ri wokajil ajchajin tinamit xk’ulmataj paq’ij domingo 18 rech enero ri’.
Pa nab’ejsab’al ub’ixik, eri wokajil ajchajin tinamit xkiya utzijol che xkiriqo jun raqarik k’aqb’al pa le jun nimaja ri xtzukux upam ri’ pa le sector rech Altos rech Santa María, pa San Pedro Ayumpuc ri’, jeri’ xkiriqo jun altar chech ri jun santa muerte xuquje’ k’o nik’aj chik jastaq maj pa usaqil xriq ri’. Eri puqtzukunem sib’alaj terne’m ub’anik ruk’ kachb’ilanik ri q’atol tzij rech ri Ministerio Público ri’ (MP).
Pa nimaq’ab’ ri’ xb’an utzukuxik pa taq nimaja pa jalajoj taq k’olib’al rech Villa Nueva, chi k’u ri’ xb’antaj kowonem xkichap loq nik’aj e’itzelalaj xib’ib’anel rech ri Barrio 18, ri xch’ob’ kuwach are a Henry N, ukojomb’i’aj “El Barbas”, ri aj kamisanel ruk’ k’aqb’al q’aq’ ri’, xuquje’ a Axel N, 18 ujunab’, ukojomb’i’aj “El Pinky”, eri upatan ri are toq’il pwaq pa le jun pandilla ri’.
Chi ke ri nik’aj b’anol k’ax ri xechapik xriqitaj jun k’aqb’al q’aq’ kuk’, jun nojisab’al k’aqb’al, jun k’aqb’al rech wos, ruk’ 21 chi ub’aq’ k’aqb’al utz kakojik, ruk’ jun pasamontaña ri’ xuquje’ ruk’ oxib’ chi ch’aweb’al rech eqam ri xpis b’i kumal ri q’atb’al tzij rech kakitzukuj uq’alajisaxik uwachm ri’. Eri e keb’ xek’am b’i pa taq ri q’atb’al tziji rech kaq’at tzij chi kij ri k’ax xkib’ano.
Eri PNC xuya utzijol che ri puqtzukunem are xb’an ri’ are chi’ xya’ utzijol chi ke chi kij nik’aj pandilleros e xib’ib’anel ruk’ k’aqb’al q’aq’ ri xeriqitaj pa jun nimaja k’o pa le colonia Plan Internacional rech ri uq’ab’ tinamit ri’. E’are k’ut nik’aj winaq ri’ xechapik e’are xkib’an ri k’aqanik chi ke ri e’ajchajin tinamit.
Pa jujun taq puqtzukunem ri’ are uwach ri Korlim Kowilaj Chajinem ri xtaq ub’anik ri xya’ ub’ixik iwir pa q’axeb’al tzijolinem pa amaq’ tinamit rumal ri k’amal b’e qatinamit ri’, Bernardo Arévalo, rech jun ik’ kanajtib’ ub’anik pa ronojel rulewal ri amaq’ tinamit ri’. Are la’ xtaq ub’anik rech keq’atexik ri nik’aj molaj b’anol k’ax e’itzelalaj xib’ib’anel, ri nik’aj maras, nik’aj pandillas, jeri’ rech kaq’atexik ri nik’aj b’anoj k’ax ri’ ri nik’aj che ri kakitukij ri xib’ib’anik pa rulewal amaq’ tinamit.
We chanim e k’o chik e 44 chi winaqib’ e’ajb’anol k’ax ri’ e chapom, ri xriqitaj oxib’ k’aqb’al q’aq’ kuk’, jeri’ 9 chi ch’ich’ kib’insam xuquje’ ruk’ 36 chi kejach’ich’ xechap ri’, jun chi ke xa’ keleq’am ri’. Eri q’atb’al tzij ri’ xkib’an kasik’ixik ri winaqilal rech chakiya’o b’a’ kitzijol nik’aj b’anol k’ax ri’ xuquje’ ruk’ ri b’anoj k’ax kakilo ri’ chakib’ij loq pa le 110 rech ri PNC xuquje’ pa le 1561 Crime Stopers ri’.