K’o jun ajtojom chajinel xchapataj loq kumal reqa’lenelab’ le Comisaría 13 rech ri Wokajil Ajchajin Tinamit (PNC), pa le 20 calle 24-67, zona 10 rech uk’u’x nimatinamit, are chi’ xchapik q’ab’arel utzijom tzam reqam k’aqb’al q’aq’. Ri are xchap chi uwach ri supermercado che ri kachakun wi ri jun ajchajinel ri’.
Eri jun achi ri’ are ri jun a Edgar N, 52 ujunab’, ri k’o 40 mul chapom kumal q’atb’al tzij okinaq pa japache’ tz’apib’al ri’, xuquje’ kab’ixik k’o 56 umak ub’anom, k’o elaq’ ub’anom, k’o winaq e releq’am b’i, k’o awan kunb’al uk’am ruk’, ri are okinaq pa kachoch winaq, k’o k’aqb’al q’aq’ reqam maj uwujil, k’o winaq e’uxib’im, lub’anom ch’ojinik, e’uch’ayom winaq, k’o e’uxib’im, k’o nik’aj chik b’anoj k’ax ub’anom.
Eri rajtzij ri PNC, Edwin Monroy xuya ub’ixik che xmajta ri tzukno’jchak chi rij jun achi b’anol k’ax ri’ rumal su/jasche xok’am pa le kacho’ik xb’an rumal ri empresa rech seguridad privada ri xuk’am ruk’ pa tojom chajinem, rumal pane’ b’a’ k’i umak ub’anom tz’ib’atal ub’i’ che ajchajinel pa le Dirección General rech Servicios rech Seguridad Privada (DIGESSP) ri’.
K’a pa le Ministerio rech Gobernación (MINGOB) ya’om wi pa uk’utik ri b’anoj chak rech ri Política rech Seguridad Privada rech kakitern’ej ub’anik ri q’atam chajinem, ri chajinik kub’an ri wokajil pa le tojom chajinem kub’an pa amaq’il. Rumal eri jun cholchak ri’ are utaqim uq’atik rech pa jikomal b’a’ kachakunik ri wokajil ri’ pa le unimaxik ri taqanem kimik.
Eri winaqil pa tinamit wexa’ k’o kitzijol ajb’anol k’ax rech taq ri wokajil ri tojom chajinem kakib’ano, chakib’ij b’a’ loq pa le 110 rech ri PNC xuquje’ pa le 1578 rech ri DIGESSP. Pa aninaqil k’ut kakib’an le rilik kumal ri e’ajeqa’lenel.