Eri tzukunelab’ rech ri División Especializada rech Investigación Criminal (DEIC), rech ri Wokajil Ajchaji Tinamit (PNC) pa kemonchak ruk’ ri Ministerio Público (MP), xkib’an ri puqtzukunem solinik pa le zona 11 rech Xe’laju’, chi la’ k’ut xchap wi loq a Mario “N”, 42 ujunab’, kab’ixik xa’ xub’an k’ax elaq’nik, xreleq’aj kiwujilal kib’i’ winaq rech xub’an elaq’nik xuquje’ rumal xukoj ri wujil man k’ot pa ucholajil usaqilal ri’.
Eri PNC kub’ij eri jun xchapik are rumal xunimaxik utzij ri q’atb’al tzij rech xutaq uchapik ri’ pa le 25 rech enero rumal jun q’atb’al tzij rech le rulewal tinamit ri’. Pa le uchapik, xtzukuxik pa jun chik nimaja ri xriqitaj wi loq Q450 mil chi pwaqilal ri’, ruk’ nik’aj ch’aweb’al, jun kematz’ib’ab’al xuquje’ ruk’ k’ilaj taq wujilal ri’ ri tajin usolixik utzijolil kumal ri q’atol tzij rech ya’ik uchuq’ab’ ri uq’alajisaxik ri’.
Jacha le kub’ij ri ub’ixikil ri’, eri jun winaq ri’ are kab’ixik kuloq’ xuquje’ kuk’ayij kulew kijuyub’ ri winaqil ruk’ taq wujil xa’ releq’am uwach ri’, ruk’ ri’ k’o chom pwaq xuchap chi rij taq, jeri’ xub’an ri k’ax chi ke taq ri winaqil ri’.
Eri jun chajinem tzukunik chi rij are la’ uwach uterne’xik ri elaq’ tajin rumal xuquje’ rech kaq’alajisax uwach taq ri pwaq xuchap chi rij ri’, ruk’ wa’ are kaya’ik uchuq’ab’ ri uq’alajisaxik ri’ pa le reqale’n uchak ri Ministerio rech Gobernación, pa le uq’atexik kuwach nik’aj molaj b’anol k’ax.