Eri reqa’lenel ri División Especializada rech Investigación Criminal (DEIC) rech ri Wokajil Ajchajin Tinamit (PNC) xkichap jun molaj chi winaqil e’eleq’omaq’ kib’i’ “Los Lauren Paleck”, e’are k’ut xkib’an elaq’ pa taq ch’aweb’alib’al pa tinamit. Are wa’ jun nim uq’atexik xb’an ri ciberdelincuencia ri’ pa taq le tzukunem xb’an pa komonchak kuk’ rajq’atol tzij ri MP, pa Retalhuleu, Zacapa, jeri’ pa nimatinamit Iximulew.
Pa taq le tzukunem ri’ e k’o waqib’ chi elaq’omab’ xechapik. E’are k’ut a Manuel N, 36 ujunab’; a Manuel N, 63 ujunab’, a Pablo N, 20 ujunab’; al Yenifer N, 30 ujunab’; al Ana N, 44 ujunab’; xuquje’ a Ana N, 49 ujunab’, ri kab’ixik e’are k’o ri xkeleq’aj, k’o ri pwaq/rajil xkipoq’saj, ruk’ nik’aj chik jastaq meb’il maj pa usaqil ub’anik kumal.
Pa ri kachoch winaq xtzukux upam taq, chi la’ k’ut eri wokajil ajchajin tinamit k’o ch’aweb’alil xkiriq loq, k’o wuj rech xkoj pwaq pa rachoch ja k’olme’r ri’, ruk’ k’i taq wujil che ri xmolik rech kaq’alajisax uwach ri’. Konojel nik’aj winaq ri’ kab’ixik xek’am b’i pa taq ri q’atb’al tzij rech kaq’at tzij chi kij rumal ri k’ax xkib’ano, rech kechomaxik.
Eri q’atb’al tzij, xkiterne’j ri b’iw b’ixik loq kumal ri winaqil, rech kakiq’alisaj, chi rij taq ri pwaq xkoj pa ja k’olme’r, pa ronojel ri’ k’o Q848,900 ri maj pa usaqil xkoj pa taq ja k’olme’r pa tinamit, jeri’ pa nik’aj chik nimatinamit.
Eri tzukunem chi rij wa’ xuq’alajisaj ub’ixik, che ri nik’aj uwinaqil ri molaj b’anoj k’ax pa le red social Messenger xkitzukuj wi ri winaq rech xkib’an k’ax chi kech, ri xkijo’saj apanoq rumal xkib’ij chi kech che e kalaxik kachalal.
Te k’u ri’, sib’alaj xktoq’ij apanoq pwaq chi kech chi rij kakik’ama kijastaq, k’olib’al pwaq taqom, ri xkib’ij che are q’atim kanoq, rumal k’o ri tojb’al kab’an chi rij.