Pa 17 rech junio ri’, eri reqa’lenel ri Subdirección General rech Investigación Criminal (SGIC) rech ri Wokajil Ajchajil Tinamit (PNC) xkib’an jun tzukunem rech kaq’atexik e ajb’anol elaq’ pwaq rajil ruk’ taq kitzijol winaq pa nimaja k’olme’r ri’. Eri e ajchajil tinamit xuquje’ ri Ministerio Público (MP) xkib’an julajuj chi tzukunem rech xkisolij xuquje’ rech xkik’am b’i ri jastaq rech q’alajisab’al ri k’ax xb’an pa nimatinamit Iximulew, pa Xe’laju’, pa Baja Verapaz, pa Chiquimula, pa Escuintla xuquje’ pa Jutiapa ri’.
Eri q’atb’al tzij xkib’ij chi e k’o lajuj chi winaqilal xechapik e are wari’: a Jefferson David, a Dany Ottoniel, a Cristian Estuardo, a Julio Roberto, a Bernardo N., a Johnny José, al Claudia Yesenia, a Fredy Oswaldo, a Kevin Manolo xuquje’ a Kevin René. E are kab’ixik xkijo’saj e k’i taq winaqib’ rech uwachwuj kemtz’ib’ pa kaqiq’ xuquje’ rech xkeleq’aj kirajil. E are kab’ixik xkib’an k’i taq elaq’ xuquje’ xkikoj kitzijol ri winaqil ri’. Rumal ri’ sib’alaj katajin ri tzukunik chi rij wari’.