Pa Taxisco, Santa Rosa, eir reqa’lenel ri División Especializada rech Investigación Criminal (DEIC) ri’ rech ri Wokaj Chajin Tinamit (PNC), pa kemonchak ruk’ ri q’atol tziij rech ri Ministerio Público, xkib’an k’i taq tzukunem, solinik xuquje’ q’alajisab’al xriq pa le colonia Lomas rech Lindora, pa le uterenb’exik uq’alajisaxik jas/su xkam jun winaq pa le zona chi la’.
Pa jun chik puqtzukunem xb’anik, eri e ajchajil tinamit xkichap e lajuj chi winaqil ri’ kab’ixik e are uwnaqil ri jun molaj b’anol elaq’omab’ che e ajworol ja. Eri nik’aj winaq ri’ xechapik are chi’ xb’an jun tzukunem ri’ che ri xmaj ub’anik iwir xuquje’ ri xk’is pa nimaq’ab’ kamik, pa le kikómetro 66 rech ri nimab’e kel b’i Escuintla pa Taxisco, Santa Rosa. Eri winaqil xechapik xech’ob’otaj e are a Víctor Flores, a Bryan Enríquez, a Jimmy González, a Salomón López, a Gerson Lazo, a Bryan Arévalo, a Cristian Monzón, a Christopher Herrera, a Andy Rivas xuquje’ a Marvin Castillo ri’.
Xuquje’ xb’an kowonem xriq jun ch’ich’ rech eqab’al jastaq ruk ri placlas ri’ circulación C-932BWK, ri kab’ixik che xeleq’axik pa le 13 rech febrero pa San José Villa Nueva, Iximulew.
Xuquje’ xriqitataj ri k’ay jastaq man kach’ob’ taj jas/su upetik, ri are k’o tzam, ja’ xalam, ja’ kaq’ab’arib’al xuquje’ jastaq rech yakon ja, ruk’ nik’aj chik jastaq. Pa uxukut ri k’olib’al ch’ich’ xtzukuxik, k’o jun ch’ich’ xriq chi la’ are la’ xk’am b’i rech kuq’alajisaj ri b’anoj k’ax ri’.
K’o nik’aj chik winaq xechap ri’
Pa le wuqq’ij ri’, k’o k’i taq tzukunem xb’an rumal ri Wokaj Ajchajin Tinamit pa le uq’atexik ri molaj b’anol k’ax ri’. Pa miércoles ri’, pa le kilómetro 22 rech ri nimab’e kab’e pa le Pacífico xechap wi nik’aj winaq ri’ ketajin che b’anoj k’ax, e kajib’ chi winaq ri’ kab’ixik e kakeleq’aj ri kaxonach’ich’ ri’. Pa le tzukunem ri’ xe’esax jun ajb’inisal ch’ich’ chi upam jun ch’ich’ pa kaq’ab’ nik’aj b’anol k’ax. Eri ch’ich’ ri’ reqam b’i ja’ch’ipaq. Pa le tzukunem xriqitaj jun k’aqb’al xuquje’ keb’ q’ateb’al retal taq GPS. Are wa’ xb’antaj kowonem ruk’ are chi’ rumal k’o jun winaq xuya loq utzijol b’ixik
Pa Coatepeque, Xe’laju’, k’o jun achi ajchapol taq ixoq xchapataj loq pa jun tzukunem kumal reqa’lenel ri División Especializada rechInvestigación Criminal (DEIC) ri’ rech ri PNC. Eri jun achi k’o 57 ujunab’, kab’ixik xaq katajin xub’an k’ax chei rech jun ixoq, rumal ri’xchapik.
Eri e ajchajil tinamit ri’, pa le zona 3 rech rulewal tinamit rech Escuintla xkichap wi jun winaq 26 ujunab’, kab’ixik xunawilij xub’an jun kamisanik xuquje’ elaq’. Eri tzukunem ri’ are xb’an pa uterenb’exik ri jun elaq’ xb’an ruk’ jun ajk’ayil jastaq chi la’. Eri tzukunel xkiriq k’i taq jastaq rech kuq’alajisaj uwach ri tzukno’kchak tajin chi rij wari’.
Pa Suchitepéquez, eri b’iw ub’ixik kumal winaqilal are xuq’alajisaj chi kuwach ri reqa’lenel ri PNC rech rulewal tinamit chi la’ k’ut xkichap wi nik’aj winaq k’o xkeleq’aj kuk’ ri e ajk’ayin jastaq che ri keb’in pa taq ri nimab’e chi la’. Xuquje’ kab’ixik eri nik’aj winaq ri’ e are kakib’an ri elaq’ pa taq ri ch’ich’ rech ereb’al winaq pa tinamit. Eri ajchajil tinamit ri’ xkichap nik’aj elaq’omab’ ri’ pa le cantón Santa Marta, zona 3 rech Mazatenango, are chi’ e b’enaq pa jun tuc tuc. Ar chi’ xesolixik, xriqitaj jun k’aqb’al kuk’ ri maj uwujil, xuquje’ ruk’ b’elejeb’ ch’uti’n k’olib’al marihuana.
Eri ajchajil tinamit chi’ xkib’ij che rumal e k’o winaq xkiya ub’ixik chi k’o elaq’ kakib’an nik’aj b’anol k’ax ri’ chi ke ri e ajk’ayin jastaq ke’opan pa nimab’e chi’ jeri’ kuk’ ri ajk’ayinelab’ rech pa tinamit ri’.
Eri q’atenik ri’ are la’ tajin rumal ri K’amal B’e Amaq’ Bernardo Arévalo xuquje’ ruk’ ri Ukab’ K’amal B’e Amaq’ Karin Herrera pa kaq’atexik ri molaj b’anol k’ax ri’ xuquje’ pa le b’anoj ya’olchajinem winaqilal. Eri puqtzukunem chajinik are la’ tajin uterenb’exik ub’anik pa ronojel ri amaq tinamit, rech taqim uya’ik pa ujikomal ri tik’ib’am ucholalejil xuquje’ rech kek’oji pa joremal ri winaqil pa tinamit.