Rumal k’ut ri k’ax xb’antaj pa le jun kacha’ik ri k’ak’ q’atb’al tzij rech ri Nimatijob’al rech San Carlos Guatemala (USAC), pa amaq’el ketajin pa chajinem ri reqa’lenelab’ ri Wokajil Ajchajin Tinamit (PNC) pa La Antigua Guatemala, Sacatepéquez, xuquje’ pa le Campus Central, zona 12 rech uk’u’x nimatinamit. Eri kopanik chi la’ are rech kakiq’atij wexa’ kanimataj uwach ri k’ax ri’ rech pa le unimaxik ri taqom ub’anik pa amaq’ tinamit.

Le ministro rech Gobernación, Marco Antonio Villeda, xuya ub’ixik ucholaj pa le jun video rech taqawokajil chi rij wari’.

“Kaqaterne’j ub’anik ri chajinem ruk’ ri k’ak’ kemechakub’al ri’ rech ukub’isaxik ri jikom ch’ojib’al ya’tal ub’anik pa joremal, rech e chajim keto’ik ri e’ajtijoxel kuk’ ri winaqilal ri’, jeri’ rech uq’atexik b’a’ ri k’ax kab’anik”, jeri’ xkub’isaj ub’ixik pa le uwachwujil pa kaqiq’ rech ri Ministerio rech Gobernación (Mingob).

Xub’ij k’ut che xtaqon chi ke ri wokajil ajchajin tinamit rech pa suk’ilal b’a’ kechajinik, pa jikomal kuwenta xuquje’ rech pa unimaxik ri taqom ub’anik pa saqilal ri’, rech uq’atexik k’ax, ch’oj ri’, rech kachajixik kato’ik ri winaqilal ri’ rech kab’an ri utzil chi re ri ucholajil wokajilal.
“Kojtajin che uchajixik rech man k’ot ri k’ax kab’an taj ri’ xuquje’ rech man k’ot jun winaq uwam rib’ kuk’owisaj tzij tane’”, xcha’.

Sib’alaj xub’ij che ri wokajil ajchajin tinamit man xaq kakimino kib’ pa kajuyub’ kachoch winaq we man e taqom ta rumal q’atb’al tzij, jeri’ xub’ij chi rij ri xk’ulmataj pa le jun hotel che ri xb’an wi ri k’ak’ cha’onem. Rumal ri’ xub’ij che k’o pa usaqilal ri kopanik chi la’. “Eri kichakunik k’o pa saqilal ri’ rumal ri q’atb’al tzij, chikub’isaj iwanima’ che ri Ajchajin Tinamit ri’ k’o pa suk’ilal ri xkib’an ri’, rumal eri kichak are rech ketob’an chi ke ri wokaj e’ajtijoxel rech ri nimatijob’al ri’ jeri’ chi ke ri winaqil pa tinamit, xuquje’ kek’oji ri’ rech pa unimaxik ri taqanem tzij ri’”, xcha’.

Le nim tat Villeda xuquje’ xub’an jun kasik’ixik ri wokajil e q’atb’al tzij rech chakib’ana’ b’a’ jacha ri suk’ilal kataqon wi ri Nima taqanib’al rech Amaq’ Iximulew ri’ rech pa aninaqil b’a’ kachomataj kumal ri jujun taq man utz taq utzilal ri’ ri xk’ulmataj pa le k’ak’ cha’onik pawe q’ij kamik, rech kaya b’a’ uq’ijol ub’anik ri suk’ilal ri suk’umalil, jeri’ rech kaq’atexik man k’ot chik ri k’ax ch’ojinik.

“Jacha ri’in in aj sancarlista xuquje’ in winaq aj iximulew ri’ man utz ta kinwilo kab’an ri k’ax ri’ ri kub’an itzelil chech ri ucholaj ajawaxik pa nimatijob’al, ch’ojim utzijoxik rij maj kitzijil ri q’atb’al tzij, xuquje’ ri kub’sib’al k’u’x taj kariqitaj wi ri Nimatijob’al rech San Carlos, rumal k’ut che nim ri upatanib’al pa taq le b’anow chomanem ri’ xuquje’ pa le upatan ub’anom pa le uk’aslemalil ri amaq’ tinamit”, xcha’ le tat Villeda.