Rumal k’ut ri b’anoj tzukunik xb’an kumal rajchajinel ri Wokajil Japache’ ub’i’ (DGSP), pa taq le 21 chi japache’ tz’apib’al winaq ri’ pa we amaq’, majun b’a’ b’anoj k’ax xk’ulmataj tane’ ri’, majun b’anoj ch’ojinik, majun b’anoj yoq’onik, majun b’anoj k’ax tane’ xk’ulmatajik, xcha’ ri ajtzijolinel rech ri Wokajil ri’.
Eri ajtzijolinel rech ri Wokajil ri’ Carlos Morales xub’ij “Jewa’ xb’antajik rumal ri cholchak rech ya’olchajinik xb’an pa juntir ri 21 uwokajil japache’ tz’apib’al ri’, rumal k’ut ri ya’olchajinik xkib’an ri e ajchajinel chi’ pa le kachajixik ri winaqil kachalal taq ri e tz’apil pache’ ri’”. Xcha’.
Eri Morales xub’ij chik we kamik juntir b’a’ k’o pa ujikomal pa le DGSP ri’, rumal ri’ e k’o 25 mil 356 chi e ajpache’ e tz’apil ri’ xuquje’ pa juntir jun junab’ ri’ k’o 305 chi b’anoj tzukunik pa ronojel xb’antaj pa taq le japache’ e k’o pa we amaq’.
Katajin b’a’ uchomaxik kasuk’umaxik ri e tz’apil pache’ ri’
Eri ajtzijolinel xub’ij ri’ are wa’ jun nim uwach chakunem katajin ub’anik pa le kasuk’umaxik rech e utz chik pa kib’antajil ri e ajpache’ rech aretaq ketzoqopax b’i rumal pa taq le 21 chi japache’ tz’apib’al pa junab’ir kanoq e k’o xkitijoj kib’ che bachilleres rech Ciencias y Letras, rech Ukab’ Q’attijonem xuquje’ rech Nab’e Q’attijonem ri’ xuquje’ e k’o nik’aj chik jalajoj uwach ri tijob’enik xkesaj ri’ rech k’o xkitijoj kib’ che uchakuxik k’amq’aq’nil, nik’aj chik rech e ajsolol che’, nik’aj chik xe’ok che e ajb’anol je’l wa rikil, are wa’ rech aretaq ketzoqopax b’i k’o chak keta’m chik rech kakichakuj pa kik’aslemal aretaq ke’opan pa taq kachoch, rech man k’ot chik b’anoj k’ax kakib’an tane’ ri’.