Pa jun puqtzukunem sib’alaj utz xb’an pa saqarib’al kamik, eri wokajil ajchajin tinamit xkib’an ub’anik ri chaijnem pa jumul chik pa japache’ Renovación 1, k’a iwir xkitukij kib’ ri ajpache’ ri. Pa nimatzijolinem, eri ministro rech Gobernación, Marco Antonio Villeda, xub’ij che pawe q’ij kamik che b’anoj puqchajinem ri’ xb’an maj jun ajchajinel xkam ri’ xuquje’ eri nik’aj ajpache’ kitukim kib’, xeq’atataj ri’. Rumal ri’ pa kemonb’al xkiterne’j ub’anik ri kichak chajinem pa le Kitz’apib’al Achijab’ rech ri zona 18 ri’, rech uk’u’x nimatinamit, xuquje’ rech Fraijanes 2 ri’.
Eri puqtzukunem are xb’an kumal rajchajinel ri Taqawokajil rech Japache’ ub’i’ (SP) xuque’ kumal ri wokajil ajchajin tinamit xuquje’ ruk’ ri katob’anik ri Taqawokajil rech Ajchajin Amaq’ Iximulew. Rumal k’u ri’, eri Ministro Villeda xub’ij che xe’esataj loq ri ajchajinel pa kaq’ab’ nik’aj b’anol k’ax pa japache’ ri’. Pa aninaqil k’ut eri q’atbal tzij xkimaj retaxik ropanb’al ri k’ax xb’anik, pa le nimaja rech chakunib’al ri’.
Eri tat Villeda sib’alaj xub’ij che ri Wokom K’amal B’e Amaq’ man kukut taj kimak man kachoman ta kuk’ ri nik’aj molaj b’anol k’ax, xuquje’ xkub’isaj ubixik che ri kaq’atexik ri’ tajin rumal ri PNC jacha ri kub’ij ri taqanem xuquje’ pa le uq’ij ropanb’alil ri’. Xuquje’ xub’ij che kuna’o jun nimalaj q’oxomal ri k’ax kamisanik xb’an chi ke ri e wuqub’ reqa’lenel ri PNC xekamik, rumal xek’aq kumal nik’aj e itzelalaj taq b’anoj k’ax.
We chanim, e k’o chik waqxaqib’ e’ajb’anol k’ax ri’ xuquje’ k’o jun pandillero xkam chi ke. Pa taq jalajoj puqtzukunem xeriqitaj k’ilaj k’aqb’al q’aq’ xuquje’ ri ch’ich’ ri’.
Rumal ri’ xek’oji ri’ ri ministro rech ri Defensa Nacional, Henry David Saenz Ramos ri’, xuya utzijoxik che ri katerne’xik ri chajinem pa Escuintla ri’ pa le Operación Centinela rech utaqim ri puqchajinem tzukunik rumal ri Wokom K’amal B’e Amaq’. Pa le tzijolinem eri viceministro rech Seguridad, Esturado Solorzano ri’; ri viceministro rech Antinarcóticos, Víctor Cruz ri’; ri k’amal b’e rech ri PNC, David Custodio Boteo ri’ xuquje’ ri k’amal b’e pa junamamil, Héctor Prera ri’.