Eri reqa’lenelab’ ri Subdirección General rech Análisis rech Información Antinarcótica (SGAIA) rech ri Wokajil Ajchajin Tinamit (PNC) ketajin che kaq’atexik ri molaj b’anol k’ax rech ri narcotráfico che ri tajin kakaj kek’oji pa rulewal tinamit ri’. Pa le uq’atexik taq ri antinarcóticos k’ate ri’ xb’antaj kowonem xriqitajik ri awan kunb’al pa le rachoch k’olib’al kopanib’al jukub’ pa uwi palow ri’, xuquje’ k’o tiko’nib’al awan kunb’al xriqitaj pa taq ri ka’che’laj rech Iximulew ri’.
Eri jun chi ke ri puqchajinem tzukunik ri’ are xb’an pa rachoch k’olib’al ri Portuaria Santo Tomás, ri k’o pa Puerto Barrios, Izabal, chi la’ k’ut eri ajchajinelab’ rech antinarcóticas xkiriq waqib’ chi chim k’olib’al ruk’ ri marihuana, 498 chi lame’t k’olib’al ruk’ ri cannabis xuquje’ nik’aj chik jastaq maj pa usaqil ri k’o xriq chi upam ri jun kaxonach’ich’ che ri xok loq pa rulewal ri qatinamit upetik b’a’ pa Estados Unidos rech América. Eri xriqitaj ri’ pa le jun tzukunem xb’an ruk’ katob’anik ri binomios K-9, ri are kuwach jun k’amal b’e ruk’ jun tz’i’ eqa’lenel, ri xusiqo ri awan kunb’al ri xk’ut chi kuwach ri e’ajchajinelab’.
Pa Puerto Quetzal, Escuintla ri’, xya wi loq ub’ixik chi k’o 292 chi pisoj ruk’ cocaína xriqitajik. Eri jun eqa’n chi awan kunb’al ri xriqitaj ri’ pa jun kaxonach’ich’ upetik pa Puerto Caldera, Costa Rica. Eri tzukunem ri’ are la’ xriqitajik are chi’ xtzukux upam nik’aj pisoj ri xpis b’i kumal ri q’atb’al tzij. Rumal ri’ xmajtaj ri tzukunik chi rij ri’ rech kab’an le rilik jachin xetaqaw loq xuquje’ rech kaq’alajisax uwach.
Eri xriqik kutun rib’ ruk’ ri awan kunb’al riqom
Rumal ri’ eri wokajil ajchajinelab’ e antinarcóticas xkiya utzijol chi xkiriqo 18,640 chi raqan ichaj tikom rech coca, che ri xriqitaj pa jun k’ache’laj rech Poptún, Petén. Eri awan kunb’al ri’ eri rajil kab’ixik are kopan pa Q186,400. Pa taq ri puqchajinem tzukunik ri’, are la’ qas xuya pa retalil rech xriqitaj loq ri awan kunb’al pa amaq’ tinamit.
Eri b’anoj tzukunem kumal ri ajchajin tinamit are la’ uwach ri chak tajin rumal ri Ministro rech Gobernación, Marco Antonio Villeda, xuquje’ pa kemonchak rumal ri Viceministro rech Antinarcóticos xuquje’ Seguridad Fronteriza, Víctor Hugo Cruz, ruk’ wa’ are kakik’utu che qastzij b’a’ ketajin che ri patanem ri Wokom Amaq’ pa le kaq’atexik ri molaj b’anol k’ax pa taq nimatinamit pa le uperajil nimajuyub’ ri’.