Sib’alaj xkijipij kib’ ri wokoj reqa’lenelab’ taq ri unidades especializadas ri’ rech ri Wokajil Ajchajin Tinamit (PNC) xuquje’ kuk’ wokoj rajchajinelab’ le Grupo Élite rech ri Sistema Penitenciario (SP) kimik ri’ xkib’an keb’ chi tzukunem pa junamam ub’anik xb’an pa rachoch taq japache’ ub’i’ Centro rech Detención Preventiva “El Boquerón”, k’o pa Cuilapa, Santa Rosa, xuquje’ pa le Centro rech Detención Preventiva kech Achijab’ rech ri tinamit Santa Cruz rech ri Quiché, Quiché ri’.
Le Ministro rech Gobernación, Francisco Jiménez, pa le keme’uwach rech X, xub’ij wiri’, chewe ri xb’antaj ri’ are rech xb’an jun nima q’atenem chajinik pa rachoch taq ri japache’. “Ronojel ri b’anowem k’o ri kupetisaj ri’”, xcha’.
Rumal k’u ri’, eri Junamam K’amal B’e rech ri PNC, Helver Beltetón, pa jun solinem xub’an pa le rachoch ri japache’ rech El Boquerón, sib’alaj xub’ij chi k’o nim upatanib’al ri chajinem pa taq rachoch japache’ ri’ rech q’atenik b’anoj k’ax.
Xachb’ilax rumal ri Subdirector rech Investigación Criminal, Edis Fabián, ruk’ ri Subdirector rech Operaciones, Jacinto Quiché, xuquje’ kuk’ rajtaqanelab’ ri wokaj chajin tinamit.
Pa le b’anon puqtzukunem ri’, pa komonchak kuk’ ri uwokoj Binomios K-9, xb’an k’ut ri tzukunem pa rachoch taq ri japache’ tz’apib’al ri’. Eri wokajil ajchajin tinamit ketajin b’a’ che utzukuxik uq’atexik awan taq kunb’alil, k’aqb’al q’aq’, awan jastaq kunb’al, ch’aweb’alil, xuquje’ ruk’ nik’aj chik jastaq k’o ri q’atb’al tzij chi rij ri’. Jeri’ rech xk’ub’isaxik ub’anik ri ucholalil k’olib’em pa jikomal pa tinamit xuquje’ rech ri b’anoj kaq’atexik taq ri b’anoj k’ax, kumal ri molaj e’ajb’anol ri k’ax ri’ che ri keriqitaj k’a pa taq rachoch ri japache’ tz’apib’al.
Ruk’ wa’ ri b’anon chajinem q’atenik, eri wokajil ajchajin tinamit are kataqim pa kub’al k’u’x ri kachajixik ri winaqilal pa tinamit ri’, xuquje’ rech uq’atexik taq ri b’anoj k’ax, eri toq’inik pwaq are qas rajawaxik kaq’atexik pa juntir, rumal are la’ jun itzelalaj b’anoj k’ax ri qas kuya q’oxomal chi kech ri winaqilal. Rumal k’u ri’, yatal b’a’ le ch’aweb’alib’al 110 rech ri PNC xuquje’ ri 1531 rech ri Centro Anticorrupción Policial, ri k’o ri’ paq’ij chaq’ab’ che uk’ulik b’iw b’ixik loq, ri yatalil panoq, rech chi upam kakib’ij wi loq ri winaqil we k’o b’anoj k’ax, awan kunb’al kakiya loq utzijol.