PNC kuya ub’ixik pa taq k’amq’axel tzijol b’ixik pa tinamit chi rij ri sub’untzij kakib’an ri ke’elaq’ik pa taq loq’omanik k’ayin jastaq  

Ri q’atb’al tzij xkinimaj ub’ixik chi rajawaxik ke’ilitaj kuwach ri winaq ke’elaq’ik, ruk’ ri kiwujil xuquje’ ri tojb’al b’insal ch’ich’ kakib’an ri’ xuquje’ ruk’ taq ri jastaq che nim kajil taq.

Rumal ri unimarik ri b’anoj taq loq’ow k’ayij che ri kab’an ujitik pa taq k’amk’at ub’ixik ruk’ taq ri kemwujil pa kematz’ib’ab’al pa kaqiq’, rumal ri’ ri Taqawokaj Ajchajil Tinamit (PNC) kub’ij chi ke ri winaq che kakichajij kib’ rech man kesub’ taj, wexa’ k’o ri b’insal ch’ich’ kakiloq’o pa taq uk’ayixik xuquje’ ruk’ ri jastaq ri nim kajil taq.

Ri q’atb’al tzij katzijoj che, are maja’ na kab’an ri loq’ow k’ayij ri’, sib’alaj rajawaxik qas kab’an le rilik uwach ri loq’omanel ri k’ayinel, ruk’ ri uwujilal xuquje’ chi rajawaxik kilik ub’antajik ri jastaq che kiya’ik xuquje’ ri kiloq’ik. Xuquje’ kab’an utzijoxik che e k’o sub’unik ke’elaq’ik ruk’ wujil pwaq (cheques), wujil rech tojb’al ruk’ nik’aj chik sub’unik elaq’nik rech utojik ri’.

Rumal k’u ri’, ri PNC kub’ij chi man kiya’ ta ri ch’ich’, jastaq xuquje’ wujilal we maja’ na kajach ri pwaq xkoj pa ja k’olme’r ri kilotaj rumal ri ja k’olib’al pwaq (banco). Xuquje’ kub’ij che kab’an ub’ixik pa taq ri k’olib’al che jikilik uwach, xuquje’ man rajawaxik taj kab’an loq utzijoxik we maja’ na kak’is uq’axexik loq le pwaq tojb’al.

Ri k’ax xk’ulmataj pa Jutiapa
Ri rajk’amal b’e ri Comisaría 21, ri subcomisario rech ri Taqawokaj Ajchajil Tinamit a Nery Ruano, xuya ub’ixik che  xya’taj jun ub’ixik pa kaq’ab’ chi rij ri b’insal ch’ich’ kik’ayexik ri ya’om ub’ixik pa aq keme’uwachwuj tzijol pa kaqiq’.

Ri ub’ixik xb’anik, che ri ch’ich’ xtojik pa ja pwaqb’al; ri winaq ajk’ayinel xub’ij loq che ri man k’ot ri pwaq xtojik xok man xok taj pa le uk’olib’alil pwaq.

Rumal k’u wa’ ri PNC kusik’ij ri tinamit winaqil che qas kakib’an le rilik wa’ jun k’ax ri’ xk’ulmatajik. We rajawaxik keto’ik chaketa’maj b’a’, che rajawaxik b’a’ ke’opan pa rachoch ajchajinel pa tinamit ri naqaj apanoq, xuquje’ wexa’ kakiya jun utzijoxik ri’, chakib’ij b’a’ pa le 110 kuk’ ri PNC xuquje’ pa le 1561 rech Crime Stoppers.