Ri Comando Antisecuestros rech ri Wokajil Ajchajin Tinamit (PNC) xkichap loq e waqib’ chi b’anol k’ax e’uwinaqil ri jun Barrio18, ri kab’ixik e’are xkeleq’aj b’i jun ixoq ajk’ayinel, 54 ujunab’, pa le condominio Valle de Navarra, San José Pinula, Iximulew. Eri ixoq ri’ are xto’ik kumal ri ajchajin tinamit.
Eri winaqib’ xechapik e’are k’ut al Andrea “N”, 32 ujunab’; a Jorge Aníbal “N” 34 ujunab’; a Wilmer Adán “N”, 29 ujunab’; a Édgar Abel “N”, 27 ujunab’; al Hilda Maribel “N”, 26 ujunab’; xuquje’ a Carlos Alfredo “N”, 35 ujunab’.
Pa le tzukunem xb’an chi kij nik’aj winaq ri’ eri ajchajin tinamit xkiriq k’ilaj taq ch’a’web’alib’al rech keqaxik, are taq ri ch’a’web’al ri’ xkoj kumal nik’aj b’anol k’ax rech xkixib’ij le rachalal le ixoq ri’, rech xkitoq’ij apan chom pwaq chi rij rech kakitzoqopij loq. Xch’ob’ k’ut che le ixoq ri’are xkik’am b’i pa le 8 rech agosto ri’ xuquje’ eri tzukunem tzij xb’an chi rij pa aninaqil rech xekowon che resaxik le ixoq pa k’ax chi la’ k’ut ri chapom wi kumal nik’aj b’anol k’ax ri xechapik.
Eri nik’aj winaq e’ajb’anol k’ax xek’am b’i pa q’atb’al tzij rech xmajtaj kaq’alajisaxik chi rij ri k’ax xkib’ano. Eri tzukunem tzij chi kij ri’, xuq’alajisaj che ri al Andrea “N” k’o chik k’i umak ub’anom, are chi’ xchapik pa julio kanoq are chi’ b’enaq pa jun ch’ich’ ri xkiriq wi jun k’aqb’al q’aq’ reqam ri maj uwujilal ri’.