Eri reqa’lenelab’ ri Wokajil Ajchajin Tinamit (PNC) xkichap jun ajtaqanel rech ri jun molaj b’anol k’a kib’i’ “Vatos Locos” rech ri jun pandilla Barrio 18, ub’i’ a Nicolás Xantes Sis, ukojomb’i’aj “El Brown”, ri k’ate xresaj b’i rib’ pa le Rachoch Japache’ Tz’apib’al kech Achijab’ Fraijanes II, Iximulew ri’.
Eri a Xante Sis ri are xchapik kuk’ e’oxib’ rachi’l e pandilleros are chi’ e b’enaq pa jun ch’ich’ ruk’ ri placas rech kab’inisaxik P-587LGN, pa le kilómetro 82, pa juyub’alil La Democracia, Escuintla ri’.
Eri e rachib’il ri’ e’are k’ut a Cristian Gérard Orellana Peralta, 26 ujunab’, ukojomb’i’aj chech “Lyro Scooby” ri’; a Héctor Mendoza de Paz, 35 ujunab’, ukojomb’i’aj chech “El Engryboy”; xuquje’ ri Carlily Analys Coronado Barrios, 30 ujunab’, ukojomb’i’aj chech “Analys”. Eri nik’aj winaq ri’ e’are e’ajtob’anel ruk’ ri jun a Xante Sis rech kuwajo rib’.
Eri a Orellana Peralta pa keb’ mul chik taqom uchapik rumal xuwajo rib’ rech xub’an ri k’ax xuquje’ rumal reqam k’aqb’al q’aq’ ri’, rumal ri’ taqom chapik rumal ri q’atb’al tzij rech Mixco xuquje’ rech Escuintla, pa le 28 rech marzo xuquje’ 11 rech abril rech pa junab’ ri’.
Pa le tzukunem ri’, eri wokajil ajchajin tinamit ri’ xriqitaj keb’ chi k’aqb’al q’aq’ ri’, ruk’ jun raqarik k’aqb’al q’aq’ ri xeleq’ax b’i pa 30 rech septiembre kaknoq, pa le zona 10 rech uk’u’x nimatinamit. Xuquje’ xriqitajik 210 chi ub’aq’ k’aqb’alil q’aq’ ruk’ jun ch’aweb’alil ri xkipis b’i ri q’atb’al tzij rech katzukux juntir utzijolil ri’.
Ruk’ ri uchapik loq ri jun a Xantes Sis ri’, e kajib’ chik ri e’ajpache’ ri e chapom chi loq, chi ke ri e juk’al (20) che ri xkesaj b’i kib’ pa le rachoch ri japache’ tz’apib’al pa Fraijanes II. Eri q’atb’al tzij rech ri Ministerio rech Gobernación (Mingob) k’o Q3 millones chi pwaqil rech tojob’al rech kariqik kachapik e waqlajuj (16) chi pandilleros karaj kechapik. Chi jujunal ri’ are katojik Q150 mil chi pwaqil ri’.