E k’o keb’ pandilleros salvadoreños xechap kumal tzukunelab’ rech ri Centro Antipandillas Transnacional (CAT) rech ri Wokajil Ajchajil Tinamit (PNC), are chi’ xb’an jun tzukunem pa komon kuk’ ri qatol tzij rech ri MP, pa jun nimaja k’o pa le 10ª avenida 0-08, Villas rech Mixco, Iximulew. Pa le tzukunem k’o awan kunb’al ruk’ pwaq xriqitajik, kab’ixik are ri’ rajil ri awan kunb’al k’ayim chi la’ k’ut.
Eri jun chi ke ri xechapik are a Madecadel Isaís García Chilin, ukojomb’i’aj “Mongol”, “Corrupto”, “Conejo”, xuquje’ “Brujo”, 34 ujunab’; are uwinaq ri jun clica Victorias Locos Salvatruchas rech ri Mara Salvatrucha (MS-13) rech El Salvador. Eri jun achi ri’ kab’ixik taqom loq uchapik ri’ rumal k’o winaq ukamisam ri’, xuquje’ rumal k’o k’aqb’al xriqitaj ruk’, rumal ub’anom k’ax elaq’ ri’, pa 25 rech marzo rech ri 2022. Are chi’ xjach b’i pa kaq’ab’ ri q’atb’al tzij salvadoreñas ri’.
Eri jun chik xchapik are jun ixoq ub’i’ Magdalena Rodríguez Martínez, ukojomb’i’aj “Dino”, 50 ujunab’, uwinaq ri molaj b’anol k’ax ub’i’ clica Hemstead Locos Salvatrucha. Eri jun ixoq ri’ xriqitajik ri’ ruk’ 121 chi k’olib’al cocaína, ruk’ oxib’ kunb’al rech crack, oxib’ upajb’al marihuana, waqib’ tarjetas SIM, jun kemepajib’al, keb’ ch’aweb’alil, xuquje’ ruk’ Q4,296 chi pwaqil b’otolik. Te k’uri’, xk’am b’i pa q’atb’al tzij rech kachomaxik.
E pa junab’ ri’. eri wokajil ajchajin tinamit kachapom chik e 45 chi winaqil pandilleros salvadoreños. Pa konojel ri’, e k’o 24 chi b’anol taq k’ax e tz’apim chik pa japache’ rumal k’o kimak xkib’an pa tinamit, xuquje’ e k’o 21 e esam b’i pa rulewal tinamit aj iximulew rumal taqom loq kachapik kumal ri katinamit kepe wiri’.