Eri reqa’lenel le División Especializada rech Investigación Criminal (DEIC) ri’ uq’ab’il le Wokajil Ajchajin Tinamit (PNC) xekowon k’ut xkichap loq e b’elejeb’ chi uwinaqil ri jun molja b’anol k’ax kib’i’ “motoladrones” ri e’elaq’omab’ e kamisanel winaq ri’, xechapataj loq pa le tzukunem xb’an ri’ pa le 26 rech febrero ri’ pa nimatinamit Iximulew, pa Mixco, pa Villa Nueva, pa Amatitlán xuquje’ pa Palencia ri’, pa le komonchak xb’an kuk’ ri q’atol tzij rech ri MP.
Eri xechapik e’are k’ut a Edwin N, 21 ujunab’; a alias “Beto” on “Canche” ri’, ajtaqol e’ajb’anol k’ax ri’; al Joselyn N, 33 ujunab’; a Hugo N, 22 ujunab’; a Meifi N, 18 ujunab’; a Randy N, 21 ujunab’; a Fredy N, 20 ujunab’; a Byron N, 22 ujunab’; xuquje’ a Daniel N, 18 ujunab’, e’are kab’ixik xkib’an ri kamisanik, k’o ri winaq xkinawilej kakamisaxik, xkib’an k’ax pa molajil, xkib’an k’ax taq elaq’, xkinawilej b’anoj elaq’nik xuquje’ xkichomaj xkib’an k’ax taq elaq’ ri’. Xuquje’ k’o ri jun kachi’l xb’ix chi rech che xtaq uchapik rumal ri’.
Le Ministro rech Gobernación, Francisco Jiménez, pa le uwachwujil pa kaq’iq’ ub’i’ X, sib’alaj xuya utzijoxik che xechap loq nik’aj winaq ri’, eri keb’ ri’ kab’ixik e’are k’ut xkikamisaj le Capitana rech ri Ejército rech Iximulew, Ingrid Morente Catalán ri’. Pa le ub’ixik ri’, le Ministro Jiménez xuquje’ xub’ij, Che pa le Nimrachoch ri Taqon Chajinem pa Amaq’ xuquje’ pa le rachoh le PNC xya wi nim uq’ijil le q’atz Capitana Morente Catalán ri’, rumal pa jikomal, pa utzilem xub’an ri uchak ri upatan pa le nimatinamit ri’.
Pa taq le tzukunem xb’antajik xechap wi ri molaj winaq e b’anol k’ax, rumal ri’ le wokajil ajchajin tinamit chi la’ k’ut xkiriq wi loq k’aqb’al ri ya’om utzijol che xa’ keleq’am pa b’anoj k’ax, ruk’ jun k’aqb’al rech q’ateb’al k’ax, ruk’ kajib’ ch’aweb’al rech eqam, ruk’ taq k’olib’al nojinaq ruk’ marihuana.
Xuquje’ e k’o kajib’ chi kejach’ich’, b’insal ch’ich’ xeriq ri’. Eri jastaq xriqitaj ri’ are kab’an uq’alajisaxik uwach ri’.
Eri q’atb’al tzij, xkib’ij che ri nik’aj uwinaqil ri jun molaj b’anol k’ax ri’ e’are k’ut xekamisan le Capitana Segundo rech Transmisiones rech ri Ejército rech Guatemala, Ingrid Morente Catalán ri’, pa le 21 rech enero kanoq, are chi’ b’enaq pa le b’insl uch’ich’ pa le nimab’e ub’i’ calzara Roosevelt. Xuquje’ tajin uq’alajisaxik ri k’ax ub’anom ri jun molaj b’anoj k’ax ri pa nik’aj chik b’anoj k’ax kamisanik pa Mixco, pa taq wokja chi la’ apanoq.