Eri extraditable Jason Antonio Yan López 42 ujunab’, xchapataj pa 20 rech febrero kumal reqa’lenel ri Subdirección General rech Análisis rech Información Antinarcótica (SGAIA) rech ri Wokajil Ajchajil Tinamit ub’i’ (PNC), pa le Centro rech Recepción rech Retornados, k’opa Ayutla, San Marcos ri’.
Eri jun achi ri’ xjach b’i pa kaq’ab’ ri q’atb’al tzij rech México xuquje’ taqom loq uchapik rumal ri nimaq’atb’al tzij ub’i’ Corte Distrital rech ri Estados Unidos rech ri Distrito Medio rech Florida, rumal xuk’ayij b’i 400 rajilab’al kapajanik ri jun awan kunab’alil rech fentanilo ri’.
Eri tzukunem chi rij are xb’an kumal ri q’atb’al tzij rech xunimaxik uwach ri taqanem tzij, rumal xch’ob’ uwach jun nim molaj e b’anol k’ax ri kachoch k’olib’al k’o pa le estados rech México xuquje’ Sinaloa, are kab’ixik xuk’ayij b’i chom pajb’alil awan kunab’al rech ri fentanilo are upetik China taqom loq pa taq le siwan taq’ajil, chi la’ kakoj wi che ub’anik jun chik uwach awan kunab’al, rech te k’u ri’ kakik’ayij b’i ri awan kunab’al ri’ pa nimatinamit EE.UU.
Xuquje’ xch’ob’ uwach che ri a Yan López, ri ajtaqol rech ri N-fenilpiperidin-4-amina-diclorhidrato (4-AP), upetik loq pa China k’a pa México, chi la’ k’ut kasuk’ub’ax wi uwach ri fentanilo rech te k’u ri’ pa awalik kakitaq b’i pa le Estados Unidos xuquje’ pa nik’aj chik tinamit.
Are chi’ xchapataj jun achi ri’, ruk’ wa’ e kajib’ chi winaqil chik e chapom rumal e k’o pa narcotráfico rech ketaq b’i pa junab’ ri’. Eri b’anonem ri’ are la’ katob’anik pa le uq’atexik taq ri molaj e b’anol k’ax pa taq amaq’ib’ ri kakib’an ri k’ax pa rulewal tinamit aj iximulew.