Eri reqa’lenel ri Comisaría 73 kuk’ reqa’lenel ri División Especializada rech Investigación Criminal (DEIC) rech ri Wokajil Ajchajin Tinamit (PNC) xkichap loq e waqxaqib’ chi uwinaqil jun molaj b’anol k’ax rech ri Mara Salvatrucha (MS-13). Ri xechap loq pa taq le tzukunem xb’an pa komonchak kuk’ rajq’atol tzij ri MP, pa jalajoj taq k’olib’em winaq rech Chimaltenango ri’.
Eri nik’aj winaq ri’ xechapik e’are k’ut a Nery N, 31 ujunab’, ukojomb’i’aj “Kaiser”; al Amelia N, 30 ujunab’; al Julia N, 50 ujunab’; al Lesli N, 19 ujunab’; a Fedy N, 28 ujunab’, ukojomb’i’aj “Sipo”, a Fredy N, 34 ujunab’, ukojomb’i’aj “Skiper”, a Laureano N, 23 ujunab’, ukojomb’i’aj “Yoiker” xuquje’ a Estuardo N, 49 ujunab’, e’are k’ut ri tajin q’atoj tzij chi kij rumal e’ajk’ayin awan kunb’al, e’ajjipin kunb’al, xuquje’ e’ajb’anol k’ax pa molajil. Rumal ri’ xtaq kichapik loq rumal ri q’atb’al tzij chi la’ k’a pa le 25 rech abril kanoq.
Pa le tzukunem xb’an chi kij ri’, eri wokajil ajchajin tinamit xkiriq k’ut Q35,865 chi pwaqil, are rajil ri k’ayin awan k’nb’al xkib’ano, ruk’ wuqub’ kunb’al crack, ruk’ b’elejeb’ kunb’al rech cocaína xuquje’ ruk’ julajuj k’olib’alil rech marihuana. Xuquje’ k’o job’ chi kejach’ich’ xkiriqo ri kojom pa b’anoj taq k’ax ri’, ruk’ keb’ ch’ich’ kab’insaxik xuquje’ kab’lajuj chi ch’a’web’al ri’ ri xpis b’i rech kaq’alajisax utzijolil ri’.
Eri q’atb’al tzij, xkib’ij eri nik’aj winaq xechapik e’are k’ut e’ajk’ayin awan kunb’al ri’, xuquje’ e’are kakib’an toq’inik pwaq chi kech ri e’ajk’ayinelab’ chi la’ k’ut. Xuquje’ k’o jun winaq tz’apimaj xb’ix chi rech che are jun ajb’anol k’ax ri’ pa rachoch japache’ rech Chimaltenango, rumal ri’ tajin uq’atik tojob’al umak xub’ano.