Pa jun nimalaj puqtzukunem kaq’atexik ri kakitoq’ij pwaq ri’ kimik k’o jun nimalaj kaq’atexik xb’anik ri nik’aj uwinaqil ri jun pandillas rech Barrio 18, rech ri jun Mara Salvatrucha (MS-13) kuk’ nik’aj chik. Eri katzukuxik ri’ xb’an kumal le reqa’lenelab’ le Subdirección General rech Investigación Criminal (PNC) rech ri Wokajil Ajchajin Tinamit (PNC), pa komon chakunem kukp’ rajq’atol ri MP, pa wuqub’ rulewal tinamit rech ri amaq’il.
Pa ronojel k’ut, e k’o 61 e’ajb’anol k’ax e’ajtoq’il pwaq xechapatajik ri’. Pa konojel ri xechap ri’, e k’o e 29 chi pandilleros rech ri Barrio 18 ri’; e k’o 27 chi mareros salvatruchas ri’; xuquje’ e k’o job’ chik winaq kakib’an ri k’ax ri’.
Xuquje’, k’o jun ala 16 ujunab’ xchapik ri xk’am b’i pa le Q’atb’al Tzij rech Ke’uchomaj Ab’om Alitom e Xib’al, xuquje’ e k’o 22 e tz’apilik xutaq kachapik, k’o kimak.
Eri nik’aj winaq ri’ e chapom rumal q’atb’al tzij rumal kakib’an toq’in taq pwaq, kakixib’ij ri winaq, rumal kimolom kib’ kakib’an ri k’ax, e k’o winaq kakitaq kakamisaxik, ri xaq katajin kakixib’ij, k’o ri k’ax kakib’an chi ke ajchoq’e, ajb’insal le ch’ich’ rech ereb’al winaq, kib’anom k’ax elaq’, k’o awan k’ayin jastaq kunb’al kakib’an ri’.
Le Ministro de Gobernación, Francisco Jiménez, sib’alaj xuya utzijol tzukunem q’atenik xub’an le División Nacional rech Ke’uq’atij Pandillas (DIPANDA)ri’ ruk’ le División Especializada rech Investigación Criminal (DEIC) rech ri PNC, xkib’an jun nim puqchajinem kaq’atexik nik’aj mareros kuk’ nik’aj chik winaq kakib’an ri elaq’ ri’.
Eri nim q’atenem ri’ are la’ le nim chajinem xtaq ub’anik rumal le Wokom K’amal B’e Amaq’ Bernardo Arévalo pa le reqele’n uchak le Ministerio rech Gobernación (MINGOB) rech uq’atexik, utzukuxik uwach taq ri toq’inik pwaq, xuquje’ ruk’ nik’aj chik b’anoj k’ax pa le tinamit. Kuk’ kachapik e 533 chi e’ajtoq’il pwaq pa junab’ ri’.