Are chi’ xban ri puqchajinem tzukunik pawe q’ij kimik kumal rajtzukunelab’ ri División Nacional rech Kaq’atexik taq nik’aj Pandillas (DIPANDA) ri’ k’o jun rajchajinel ri Wokajil Japache’ (SP) xchapik, are chi’ xopan che uk’amik ri jun chomapwaq rech elaq’ toq’inik pwaq ri’ xub’an pa le colonia El Progreso, Puerto Barrios, Izabal ri’.
Eri jun ajchajinel xchap ri’ are ub’i’ a Javier N, 36 ujunab’, are kab’ixik xchapik are chi’ xopan che uk’amik ri jun chomapwaq ri’ rech Q25 mil ri’ rech elaq’ toq’inik pwaq xub’an ri’, eri pwaq ri’ xutoq’ij ruk’ jun nimalaj xib’ib’anik, chi re le winaq kumal taq nik’aj pandilleros ri’.
Eri winaq xb’an k’ax chi re xuya ub’ixik chi ke ri wokajil ajchajin tinamit ri’ che xsik’ix apan pa uch’aweb’alib’al ri’ rech xtoq’ix apan chi rij Q100 mil chi nim pwaqil ri’ rech xkib’ij chi re man kakikamisaj taj.
Eri tzukunem rech xq’alajisax ri jun rajchajinel ri japache’ ri’ che ri are xtob’an kuk’ nik’aj pandilleros rech ri nik’aj molaj b’anol k’ax kib’i’ “Los Fatality” xuquje’ “Porteños Locos” rech ri Mara Salvatrucha (MS) ri’, jeri’ kuwach nik’aj e jo’sanel chi ke winaq ri’, ri e tz’apilik pa japache’ tz’apib’al rech Izabal ri’.
Eri jun ajchajinel ri’ ub’i’ a Fernando Bladimir Ruano Pérez, 25 ujunab’, ri tz’apim pa le japache’ ri’ ri xub’an elaq’ toq’inik pwaq, rumal ri’ xtaq uchapik ri’ rumal xub’an ri jun k’ax ri’.
Pa k’isb’al ri wuqq’ij ri’, eri rajtzukunelab’ ri DIPANDA xkib’an ri puqchajinem tzukunik kitzijol ri’, rech xb’an ri kilik kib’antajil xuquje’ rech xkilo utzijol nik’aj winaq e tz’apilik pa le japache’ rech El Boquerón, Cuilapa, Santa Rosa, xuquje’ rech pa le Granja Modelo rech Rehabilitación Cantel, pa Xe’laju’ ri’, rech xq’atexik roksaxik ri awan jastaq kunb’alil pa le rachoch japache’ are chi’ ke’opan ri winaqil che kasolixik kach’ab’exik ri e tz’apim pa japache’ ri’.
Rumal ri’ pa le rokib’al ri japache’ tz’apib’al rech Cantel xchap wiri’ a Edgar N, 31 ujunab’, ri taqom uchapik ri q’atb’al tzij rumal xub’an ri elaq’ ri’ pa le 30 rech ik’ enero kanoq. Eri jun winaq ri’ are xraj xopanik rech kusolik ri rachalal ralaxik, ri tz’apilik pa le rachoch japache’ ri’.
Eri b’anoj tzukunem q’ateb’al ri’ are kuya uchuq’ab’ ri chajinem tzukunk tajin ub’anik rumal le Wokom K’amal B’e Amaq’ pa uchakunik ri Ministerio rech Gobernación (MINGOB), rech uq’atexik taq ri b’anoj k’ax kab’an pa rulewal amaq’ tinamit.