Rech taqim ya’ik uchuq’ab’ kakunaxik ri reqa’lenelab’ ri Wokajil Ajchajin Tinamit (PNC) pa le suroccidente rech ri amaq’ tinamit, chi la’ xjach wi ri nimaja rech kakunanik pa le Comisaría 34, k’o pa tinamit rech Retalhuleu ri’. Eri k’ak’ nimaja rech kunanib’al e yawab’ ri’, rech kakunanik xuquje’ rech k’o wi uk’olib’al kunb’al xuquje’ rech e k’o e’ajkunanel e’eta’manelab’ ri’, are la’ uwach ri jun ujipixik uach b’anoj kunanik chi ke e’ajchajinel pa tinamit. Eri cholchak ri’ are utaqim ub’anik jun nim rilik we e yawab’ ri reqa’lenelab’ che ri chajinik.
Eri nimaja rech kakunanik chi ke ri e’ajchajinel e taqom pa Escuintla, pa Suchitepéquez xuquje’ pa Retalhuleu, man tojom kekunaxik kuk’ ri kachalal pa kachoch xuquje’ kuk’ ri e’elinaq chik pa uxlanem junalik. Eri nimaja ri’ k’o uchakub’alil rech b’anob’al rilik kunanik, k’o keq’oyob’ wi ri yawab’, k’o rech primeros auxilios xuquje’ k’o ri ilonem kunanik kab’an chi paq’ij chi chaq’ab’.
Eri q’atb’al tzij sib’alaj kakib’ij chewe cholchak ri’ are katob’anik pa ub’anik ri kunanem chi la’, jeri’ rech nab’ejsab’al q’atuxik yab’ilem, rech kilik we e yawab’ xuquje’ rech kilik jas ri yab’il chi ke, ronojel q’ij ke’il ri e yawab’. Eri xujaq uwach ri’ are rumal ri’ k’amal b’e Amaq’ Tinamit Bernardo Arévalo, ri sib’alaj xub’ij che ri nimaja xyakik are rech kab’an ri utzilem chi ke ri e’ajchajinel tinamit, xkub’isaj ub’ixik che ya’tal ri’ rech kab’an ri kilik kakunaxik ri reqa’lenel chajin tinamit ri’. Pa le jaqib’al uwach ri’ xk’oji le viceministro rech Seguridad, Roberto Solórzano ri’; ri gobernador departamental, Fernando Mazariegos ri’; ri rajk’amal b’e ri PNC, David Custodio Boteo ri’, kuk’ ri rajtaqanelab’ ri wokaj chajin tinamit.
Eri nimaja rech kakunanib’al eri ub’i’ xk’oj are Fernando Alexander Batres Ordóñez ri’, pa ub’i’ ri jun PNC ri xkamik pa le 18 rech enero kanoq. Je k’u ri’ pa una’tib’al uq’ij xya’ jun ya’b’al uq’ij ub’i’ “Orden Cruz de Oro” chi re, are le nim retal ya’b’al rumal ri taqawokaj ri’, chi re ri rixoqil kuk’ ri rachalal, ruk’ juntir le tojb’al rech junalik.
Pa k’isb’alil, eri q’atb’al tzij xkib’an jun kab’inik pa le rachoch ri Comisaría 34 ri’, chi la’ k’ut xkib’an wi le rilik ri chak nimanik chi ke ri winaqilal pa tinamit. Sib’alaj xkib’ij che ri b’anob’alil ri’ are la’ uwach ri jun b’anow uya’ik uchuq’ab’il ri wokaj chajin tinamit rech chi kinaqaj ri winaqilal, ri k’o uchakub’alil ya’talik.