Pa le tinamit Iximulew sib’alaj kamajtaj kiwa’ketik ri winaqilal rech kakiloq’ kijastaq kiwa kirikil, kijastaq ri’, rech kakika’yej rilik le uje’lik le juyub’ taq’aj, kajulew, le umeb’il jastaq pa taq le tinamit, xuquje’ rech kek’oji pa taq le nimaq’ij rech le Awas Q’ij pa qatinamit. pa Junab’ ri’, eri winaqil kek’oji pa le k’olib’al taq uxlanb’alil, ka’ye’jib’al, wa’kateb’al, pa uchi’ taq nimapalow, pa chajim k’olib’al taq awajib’ k’ache’laj ri’, xuquje’ pa taq le telentyox, jeri’ pa juntir taq.
Are la’ rech k’o jun utzilaj chajinem kab’an chi kech ri winaqilal e’ajsolinelab’ pa qatinamit, jeri’ pa le keb’e pa taq le uxlanb’alil, wa’kateb’al, ka’yib’alil, xmajtaj b’a’ le chajinem ub’i’ “Semana Santa Segura”. Eri cholchak chajinik ri’ are kutaqij ya’ik uchuq’ab’ ri b’anoj chajinem xuquje’ rech kaq’atexik ri k’ax kak’ulmataj tane’ pa le ke’opan wi le winaqilal wa’katelab’ pa le Nimaq’ij rech le Awas Q’ij, rumal are k’ut le Nim Rechb’al B’anb’alil Kumal Winaqib’ pa Uwachulew.
Le Ministro rech Gobernación, Francisco Jiménez, sib’alaj xuya ub’ixik eri kab’an pa le cholchajib’al ri’, k’o uk’olib’al chajinem kakoj pa taq ri nimab’e, xuquje’ ri e k’o ajchajinel tinamit kechajin chi kech ri winaqil e wa’katelab’. “Le Nimaq’ij rech Awas Q’ij, are jun q’ijol rech ch’ob’on ib’ chi kaj rech b’anoj kakib’an ri utz pa kik’aslemal le winaq, pa kachalalil, pa kachoch, xuquje’ rech jun b’anoj wa’katem kaye’jinik, xuquje’ are ri’ jun b’anoj nimachak chajinik kumal ri wokajil ajchajin tinamit”, xcha’.
Xuquje’ le Patanel rech Taqon Chajin Tinamit xub’ij, che pa le b’anoj cholchajinem ri’, man k’ot chik jun ajchajinel ka’uxlanik, man k’ot chik jun xaq tane’ kakanaj pa rachoch. “Pa konojel ri’ e k’o 38 mil chi e’ajchainelab’ kek’oji pa k’olib’al taq chajinem pa tinamit, ri kek’oji pa unajb’ejsaxik uq’atexik taq ri k’ax, xuquje’ rech kakikub’isaj kachajixik ri winaqil rech pa utzilem kek’oji ri’. Eri Wokaj Ajchajin Tinamit (PNC), kek’oji konojel pa chajimem ri’ rech b’a’ pa jikomal katk’oji pa awochoch pa le nimaq’ij ri’ kaq’axik”, xcha’.
Rumal k’u ri’, eri K’amal B’e rech ri PNC, David Custodio Boteo, xuya ub’ixik chi k’o nim upatan kaloq’oq’exik ri kichak kakib’an ri e’ajchajin tinamit rumal ri’ xub’ij chi kijujunal ri e’ajchajin tinamit kek’oji pa chajinem ri’ pa le nimaq’ij rech ri Awas Q’ij rumal ri’ katoj Q1,500 chi kech rech rajil kiwa/kirikil. Eri Custodio Boteo xub’ij chi k’o k’ak’ katz’iyaqb’al kajach chi kech xuquje k’o 2i chalecos antibalas kajach chi kiwach rech kakito’o kib’ pa le chajin tinamit kumal ri’.
Pa le q’iijol ub’anik ri chajinem ri’, ketaq ri wokajil ajchajin tinamit che chajinem pa le kab’an wi telentyox pa tinamit, pa le k’o wi nimaq’ij kab’an kumal winaq ri’ xuquje’ pa taq ri k’olib’alil uxlanb’al, wa’kateb’al kumal ri winaqil. Rumal ri’ k’o k’olib’al chajinem kakoj 21 k’olib’alil chajinem pa tinamit xuquje’ 21 chi kioskos rech nab’ejsab’al kachajixik kato’ik ri winaqilal pa wa’katem, jeri’ k’o uk’olib’al e’ajtob’anel kek’oji pa uchi’ nimapalow rech Puerto San José, pa Escuintla, xuquje’ rech Monterrico, pa Santa Rosa ri’.
Xuquje’ k’o 37 chi k’olib’al chajin winaq e wa’katel kakojik rech kab’an le rilik we man k’ot jun chi kech taqom uchapik rumal taq q’atb’al tzij xuquje’ rech kab’an le rilik we man k’ot jun reqam Itzel jastaq rech kub’an tane’ k’ax chi kech winaq. Xuquje’ rech kab’an le rilik we man k’ot jun kunimaj taj le Taqanik Tzij rech Tránsito ri’, we man k’ot uq’ab’arel utijom tzam kub’inisal le uch’ich’ xuquje’ rech kilik keqam kiwujillal ri e’ajb’insal ch’ich’ ri’.