K’o ri jun achi xresaj b’i rib’ pa japache’ tz’apib’al ub’i’ a Berni Alexander Ixcamil Alvarenga ri’ are xya utzijol ub’ixik chi xresaj b’i rib’ Granja Modelo rech Rehabilitación Canadá, Escuintla ri’. Pa aninaqil k’ut, xmajtaj utzukuxik ri’, rech kariq loq xuquje’ rech kachap loq, rech kunimaj utojik ri umak pa japache’ tz’apib’al ri’, rumal kab’ixik ajtijol rech awan kunb’al ri, ri b’anoj k’ax elaq’ ri’.
Eri Ministro rech Gobernación, Marco Antonio Villeda Sandoval, xuya utzijol che ri jun winaq ajpache’ ri’ xresaj b’i rib’ pa le nimajapache’ tz’apib’al ri sutum rij chi ch’ich’ q’ateb’al ri’, ri k’o wi ri jun garita rech chajib’al. “Man kakowon ta k’ut jachin karaj karesaj b’i rib’ chi la’, we man k’ot ajchajinel ka’ilowik”, xcha’. Xuquje’ eri ajtaqawokajnel ri’ xbu’ij che xkib’an uximik tzij chi rij pa q’atb’al tzij, xuquje’ xe’esax chi la’ nik’aj ajchajinel kechajin chi la’, ri xetaq b’i pa le Subdirección Operativa rech ri Sistema Penitenciario (SP) ri’.
Eri Taqawokajnel rech Gobernación ri’ xub’ij che man utz ta ri’ xub’an ri jun ajpache’ ri’ xresaj b’i rib’ ri’, rumal man are taj jun nim xib’ib’anel ri’ xuquje’ ri are ri’ pa 22 rech enero rech 2026 kak’ixik utojik umak ri’. “Eri utzijol xya’taj pa nab’e ri’ xb’ixik che k’o jun paqalib’al pa le ch’ich’ t’iqom ruk’ k’amq’aq’, are la’ xukojo rech xresaj b’i rib’ chi la’. Wari’ man k’ot jun kaq’ax tane’ chi rij rumal k’o chom k’amq’ab’ kojom chi rij ri’ le rachoch japache’ tz’apib’al ri’”; xcha’.
Rumal k’u ri’, eri wokajil ajchajin tinamit xkib’an ri puqchajinem tzukunik rech pa aninaqil b’a’ kachap loq ri jun achi ajpache’ ub’i’ a Ixcamil Alvarenga, ri xya’ utzijol che man xriq ta chik pa jun kajilaxik xb’an kumal ri e’ajchajinelab’ rech ri japache’ tz’apib’al winaq Canadá, chaq’ab’ rech pa lunes kanoq 24 rech noviembre ri’.
Eri Ministro Villeda xuquje’ sib’alaj xub’ij chi k’o jun nim upatanib’al kab’an ri chajinem tzukunik pa rachoch ri japache’ tz’apib’al winaq ri’, xuquje’ rech kachakuxik pa jun k’ak’ taqanem pa ronojel ri wokajil japache’. “Rajawaxik b’a’ chaqe kab’an jun k’ak’ b’anoj taqanem man rech taj kab’an ri b’anom ri’, xane’ rech kab’an ri uwach jun wokajil japache’ rech kikanimaj wi ri tojb’al chak ri’, xuquje’ rech kab’an ri kapixb’exik kasuk’umaxik ri wina e tz’apolik”, xcha’.
Are uwach ri b’anoj chajinem tzukunik ri’ rech ya’ik uchuq’ab’ ri chajinem pa le wokajil japache’, rumal ri’ eri wokajil ajchajin tinamit sib’alaj xkib’an ri puqchajinem pa le Granja rech Rehabilitación Q’antel, Xe’laju’ ri man b’anom ta kasolixik k’a pa waqib’ chik junab’ ri’. Xuquje’ pa le Japache’ kech Achijab’ Restauración Constitucional, ri ub’i’ eta’mam are “Pavoncito”, pa Fraijanes, Iximulew, ri xtulisax wi ri jun nimaja xb’an chi la’ kumal ri e tz’apilik pa le japache’ ri’.