Eri reqa’lenelaab’ ri Comisaría 53 rech ri Wokajil Ajchajil Tinamit (PNC) xkichap keb’ winaq e coyotes ri’ pa jun puqchajinem tzukunik xb’an pa le 8 rech agosot pa le kilómetro 84.5 nimab’e kab’e pa le Atlántico, juyub’alil rech San Agustín Acasaguastlán, El Progreso ri’.
Are ri’ a Melvin Eduardo, 33 ujunab’ xuquje’ a Luis Alberto, 25 ujunab’, eri ukab’ kib’i’ are e Ruano Guevara, kik’amom b’i 18 chi winaqil venezolana pa jun ch’ich’ kib’inisam. Rumal ri’ xek’am b’i pa Q’atb’al Tzij rech kechomax chi rij ri itzelal xkib’ano.
Are chi’ xilik kawa’katik ri winaq naj kapetib’al ri’, eri e ajchajil tinamit xkil k’ut che maj kiwujilal keqam tane’ loq rech keq’ax b’i pa rulewal tinamit ri’. Rumal ri’ sib’alaj xeto’ik xuquje’ xk’am kib’e xek’am b’i pa rachoch ri Instituto Guatemalteco rech Migración (IGM) rech kechomax b’i chi la’.
Pa le puqchajinem tzukunik kumal e ajchajil tinamit rech q’atenik ri k’ax ri’ are la’ xb’an chi chaq’ab’ chi paq’ij pa keb’ q’ij pa rulewal tinamit ri’, rumal ri’ eri e ajchajil tinamit xkichap loq le 77 chi winaqil ri jalajoj uwach ri k’ax xkib’ano xuquje’ xriqitaj k’ut waqxaqib’ chi k’aqb’alil. Xuquje’ xeriq e oxib’ chi ch’ich’ xuquje’ job’ chi kejach’ich’ ri kab’ixi e eleq’am b’i.