Jun q’ij karaj na ri Kiq’ij Kaminaqib’ pa taq Kamuqib’al ri’, sib’alaj kek’oji pa chajinem e 43 mil chi reqa’lenelab’ ri Wokajil Ajchajil Tinamit (PNC) pa ronojel rulewal tinamit. Are rech taqim uk’ub’isaxik kachajixik ri winaqilal pa le jalajoj taq nimaq’ij kab’an pawe q’ij ri’.
Pa le 31 rech octubre ri’ eri ajchajil tinamit sib’alaj kechajin chaq’ab’ chi rij taq uk’olib’al discotecas, restaurantes xuquje’ nik’aj k’olb’alil che ri qas ke’opan wi e k’i taq winaqil chaq’ab’ kakiriq wi kib’ pa le K’iq’ij Kaminaqib’ pa uwi taq kamuqib’al ri’. Are wa’ rech uya’ik kub’al k’u’x chi ke ri winaqil tinamit xuquje’ rech uq’atexik taq ri b’anoj k’ax, are la’ tajin ub’anik pa unimaxik ri Taqanem rech Maj Tijowtzam.
Eri wokajil ajchajil tinamit xuquje’ ketajin che ub’anik ri korlim ya’olchajinem pa le 1 mil 663 uwi kamiqib’al taq kaminaqib’ pa juntir amaq’il, rech unimaxik kachajixik ri winaqilal pa tinamit pa le nab’e xuquje’ ukab’ q’ij rech noviembre, rech ke’opan pa le kana’texik kanima’ ri kachalal e kaminaq pa uwi taq kamuqib’al pawe q’ij ri’.
Rumal ri’ tajin ri chajinem che kaqan pa taq ri ch’ich’ pa taq ri k’olib’alil rech uq’atexik taq b’anoj k’ax chi ke winaqilal, chi ke ri e ajwa’katel winaq ri’.
Nima’q taq paplo’t
Xuquje’ tajin ri q’atenik b’anoj k’ax pa uq’ab’ taq tinamit rech Santiago xuquje’ Sumpango, Sacatepéquez, rech kakub’isax kachajixik ri winaqilal che ri ke’opan pa tinamit xuquje’ ri ke’opan pa le Nimaq’ij rech Raq’anik Nima’q Paplo’t, pa ub’i’ ri nimaq’ij ri’ “Colores al Viento”. Pa le ukab’ uq’ab’ tinamit kak’ut wi kaq’ansaxik ri paplo’t, are kab’an pa le k’olib’al etz’anem ri k’o chinaqaj ri uwi kaminaqib’ ri’.
Are chajinem tajin kumal ri wokjail ajchajil tinamit pa le uq’ijom unimaxik ri cholchak Plan Operativo 41-2023 ub’i’ “Kiq’ij Konojel ri e Kaminaq Chik”, ri xutaq ub’anik rumal ri K’amal B’e Iximulew pa le reqele’nik ri Ministerio rech Gobernación (Mingob) rech ukub’isaxik kachajixik ri winaqil pa tinamit, rech uq’atexik ri b’anoj k’ax pa taq ri nimaq’ij ri’.