Eri ministro rech Gobernación, Francisco Jiménez, xuya utzijol chi k’o jun nim tzukunem q’atenik tajin pa japache’ tz’apib’al pa le Granja Modelo rech Rehabilitación Penal Pavón, Fraijanes, Iximulew ri’, eri tajin ub’anik k’o pa le k’ak’ b’anonel q’atenik ri b’anol k’ax e ajtoq’inel pwaq ri’, are wa’ jun b’anoj taqanik rumal ri nimk’amol b’e amaq’il Bernardo Arévalo, rech katoq’axik ri tob’anem kachajixik ri winaqilal e aj iximulew, rech katoq’axik kq’atexik ri nik’aj molaj elaq’omab’ che ri kakitoq’ij pwaq chi kech winaqib’. Chi rij wari’ xtaq ub’anik ri nim chajinem q’atenik kuwach nik’aj e ajtoq’inel pwaq k’a pa rachoch taq ri japache’ tz’’apib’al k’o pa amaq’il, chi kij k’ut k’o chik jun nim ktzijob’all quk’ che e are tajin kakib’an ri toq’inik pwaq chi kech ri winaqib’ e aj iximulew ri’ xuquje’ chi kech jujun taq winaqib’ ri kapetib’al. Rumal ri’ eri Jiménez xub’ij che are la’ uwach ri chak tajin pa le nab’e jok’al q’ij uchakunem pa le uq’atanik ri taqawokajnel rech ri ya’olchajinem pa Amaq’, rumal ri’ xtaq ub’anik ri tzukunem q’atenik ri’ rech kakub’isa ub’antajil pa jikomal joremal konojel ri winaqilal pa tinamit ri’.
Rumal ri’ ri ministro ri’ sib’alaj xub’ij che xutaq ub’anik ri tzukunem q’alanik ri’ k’a pa nimaq’ab’ pa le Granja Pavón, rech xtaqix utzukuxik uriqik ri awan jastaq ri’ xuquje’ rech uq’atexik ukojik ri Internet ri’, rech kach’ob’ik jachin chi kech ri winaq e tz’apilik pa japache’ ri kakib’an ri toq’inik pwaq.
Eri taqawokajnel ri’ sib’alaj xuya ub’ixik che ri kaq’atexik ri nik’aj b’anol k’ax ri’ are tijowchuq’ab’ ri’ xuquje’ man xaq ta ri’ kaq’alajin pa aninaqil ri’, emu wa’ xkub’isaj unimaxik ri xutoq loq ub’anik rumal ri k’amal b’e amaq’il, rech qastzij b’a’ kachomax uq’atexik wa’ ri jun k’ax ri’.
Xuquje’ sib’alaj xuya ub’ixik che rajwaxik kachajixik we utz ukojik ri WhatsApp, ri Telegram xuquje’ ri Signal, ruk’ nik’aj chik, rumal k’ut eri nik’aj kojob’al ri’ xuquje’ are kakikoj nik’aj pandilleros kuk’ nik’aj imitadores rech b’anoj k’ax ri’. Rumal k’u ri’ xuya’ ub’ixik che kab’an uq’atexik wari’ rech maj jun chi kech ri nik’aj molaj b’anol k’ax rech kakikoj ta chik ri uwachwujil pa kemaltz’ib’ q’aq’nil ri’ ka’ pa le e tz’apil wi loq pa japache’.
Pa le tzukunem rech kimik xetaqik e 1500 reqa’lenel ri PNC, ri rajchajinelab’ ri Dirección General rech ri Sistema Penitenciario <(DGSP), rajpatanel ri Procuraduría rech ri Derechos Humanos (PDH) ri’ xuquje’ ri q’atol tzij rech ri Ministerio Público (MP) ri’. Chanim k’ut e riqom chik 30 chi ch’aweb’alil ri’.