Eri ministerio rech Gobernación (Mingob) ruk’ rech ri Defensa Nacional (MDN) pa waqib’ q’ij rech febrero, xkimaj ri cholchajinem ub’i’ “Control Territorial pa Áreas Fronterizas”, rech xtaqixik ri b’anoj chajinem pa k’ulb’a’t juyub’ Iximulew ruk’ México.

Eri Taqawokajnel rech ri Ya’olchajinem pa Amaq, Francisco Jiménez, xub’ij eri b’anoj chajinem ri’ arech kanimaxik ri xutaq ub’anik ri k’amal b’e nimatinamit Bernando Arévalo rech ri b’anoj chajinem pa k’ulb’a’t juyub’ pa amaq’il, rech qas taqim kaq’atexik ri narcotráfico, ri ch’ijom k’ax chi kech ri winaq, q’atenik k’ayin awan jastaq xuquje’ ri maj q’atoj toq’inik pwaq aduanera ri’.

Eri Taqanel rech ri Estado Mayor rech ri Defensa Nacional, Carlos Medina, xub’ij che ri kemon puqchajinem arech kab’an pa San Marcos, pa Chinab’jul, pa Retalhuleu xuquje’ pa Quiché, rech ya’ik uchuq’ab’ ri chajinem pa rulewal tinamit xuquje’ rech qastzij kechajix konojel ri winaqilal.

Pa le ub’anik ri kemon chajinem xetaq e 500 chi ajchajinel rech ri Wokajil Ajchajil Tinamit (PNC) kuk’ 4 mil rajchajinel ri Taqawokaj rech Chajin Amaq’ Iximulew, ri pa kemon xkib’an uchajixik ri k’ulb’a’t juyub’ rech keb’ nimatinamit ri’.

Ri solinem xb’anik

Pa umajik uq’ijol ri cholchak ri’ xk’is ruk’ ri solinem pa wokajil, qas xb’an k’ut ri chajinem pa k’ulb’a’t juyub’, jeri’ pa taq nimab’e rech rulewal tinamit. Eri q’atb’al tzij rech Gobernación ruk’ rech ri Defensa Nacional xkik’am ub’e ub’anik wari’, kachb’ilam rajpatanelab’ ri Superintendencia rech Administración Tributaria (SAT).

Eri kemon puqchajinem tzukunik are kuq’alajisaj uchakunik ri K’amal B’e rech Iximulew pa le uq’atexik ri molaj b’anol kax pa taq ri nimatinamit pa uwachulew. Xuquje’ rech ya’ik uchuq’ab’ ri chajinem pa k’ulb’a’t juyub’ pa amaq’il, rech kaq’atexik ri k’ayin awan jastaq xuquej’ rech kab’an kachajixik ri winaqilal rech kek’oji pa utzilem konojel, xcha’ ri taqanel rech ri Mingob, Francisco Jiménez.