Pa nimaq’ab’ rech 14 rech agosto ri’, eri reqa’lenelab’ ri Comisaría 31 rech ri Wokajil Ajchajil Tinamit (PNC) xkiya utzijol che xechap e job’ chi winaq pa le 5ª xuquje’ 6ª avenida, zona 1 rech Escuintla ri’.
Eri Elio Enaí Díaz Mirón, 47 ujunab’, al Erika Oralia Yanet Rencancoj López 31 ujunab’, al Luz María Salazar, 24 ujunb’ ri’, al Griselda Acevedo Quevedo, 39 ujunab’ xuquje’ al Antonia José Solorzano Royan, 24 ujunab’ ri’, e are kab’ixik xkik’aq keb’ winaq rech xkikamisaj ri’.
Eri e ajchajil tinamit ri’ xya ub’ixik chi ke chi k’o jun k’aqanem pa le kilómetro 74 rech ri nimab’e kab’e pa le puerto rech San José, rech ri tinamit ri’, chi la’ k’ut xriq wi jun winaq kaminaq chik 41 ujunab’ pa tinamit xuquje’ k’o jun chik xk’am b’i pa jun ja rech kunanib’al winaq ri tech’em ujolo ri’, ri kab’ixik xkamik are chi’ xok pa aninaqil pa kunanik ri’.
Eri tzukunelab’ xkib’ij, eri nik’aj winaq xechapik e are e b’enaq pa jun ch’ich’ picop q’eq rij ruk’ ri placas rech kab’inisaxik P 8333KFY, ri kab’ixik e are sib’alaj xech’ojinik kuk’ ri winaq xkik’aqo xuquje’ xkib’an che ab’aj.
Rumal k’ut pa aninaqil ri’ eri e ajchajil tinamit xekowonik xkichap loq ri job’ chi winaqil ri’, ri kab’ixik xriqitaj jun k’aqb’alil ub’anik bayoneta ri’ ruk’ jun nawaxa, jeri’ xek’am b’i pa q’atb’al tzij e kab’lajuj chi ak’alab’ ri’, ri taq ala ri taq ali xuquje’ kuk’ e q’apojil ri’, ri k’o oxib’ pa wuqlajuj kijunab’ ri’, ri kab’ixik kachi’lam b’i nik’aj e b’anol k’ax ri’.
Eri nab’e xchapik xq’alajinik k’o jun umak b’anoj k’ax ub’anom ri’ pa le oxib’ q’ij rech marzo rech 2020. Eri nik’aj xechapik xek’am b’i pa ri q’atb’al tzij ri’.