Eri cuentas bancarias are rajilab’al k’olib’al kipwaq winaq pa pwaqb’al ja’ ri’, we kamik are tajin kakikoj nik’aj pandilleros rech ri Barrio 18, MS xuquje’ kumal nik’aj e jo’snel ri’, ri kakitaq chi ke kachalal, winaq keta’m kuwach, kib’esina, kixoqil, kinutz’el xuquje’ kalk’uwal rech kakiya’ kib’i’ kitzijol ri’ rech kakoj toq’im pwaq pa kib’i’ pa pwaqb’al ja kumal ri winaq toq’im pwaq chi ke kumal nik’aj b’anol k’ax rech kekamisax taj kumal.
Eri k’amal b’e rech DIPANDA, David Boteo, xub’ij che pa le 2020 ri’ e k’o 521 chi winaqil xechapatajik rumal xkiqaj retal k’olib’al kipwaq pa pwaqb’al ja ri’ rech xkoj ri toq’im pwaq chi upam taq xuquje’ e pa junab’ 2021 ri’ xuquje’ e k’o e 50 e chapom chik rumal b’anoj k’ax ri’ xuquje’ rech xkoj toq’im pwaq chi upam taq ri’, rumal ri’ katajin ri tzukunem chajinik rech uq’atexik ri toq’inik pwaq ri’ pa we amaq’.
“K’o jun k’ax xb’antajik qas b’isob’al ri’, rumal k’ut k’o le ixoq kuk’ayij jastaq rech katijik pa jun k’olib’al ketak’ab’ wi le ch’ich’, chi’ k’u ri’ xopan wi jun winaq xuqaj cuenta bancaria chi rech rumal xub’ij man k’ot rech, rumal k’ut k’o jun rachalal kutaq loq jun pwaq chi rech xub’ij, xuquje’ rumal xuya’ pa qajom chi rech are kutoj ri’ xcha’ chi rech. Jacha’ ri are e k’o nik’aj e ri’j winaq chik, e k’o e yawab’ xuquje’ k’o man kekowin taj keb’inik, rumal k’o kitoj chi kech kakiya’ pa qajik kib’i’ kitzijolo ri’ ri te k’u ri’ kil junti kitzijol kumal nik’aj b’anol k’ax e ajtoq’il pwaq ri’”, xcha’ ri Boteo.
Eri jun b’anoj ukojik tzijol ri’ are kakib’an ri konojel ri pandillas xuquje’ ri e ajesal achb’alil aretaq kakitzukuj winaq keta’m kuwach ri k’o kipwaqil kijastaq ri’ rech kakitoq’ij chom pwaq chi ke ri’ maj pa usaqil, xecha’ ri q’atb’al tzij rech ajchajil tinamit ri’.
Pa we junab’ ri’ eri q’atb’al tzij rech chajin tinamit, xkiya’ loq ub’ixik che e k’i ta na e chapom ri’, chi rij b’anoj k’ax ri’, are wa’ xkib’ij loq rumal ri b’anoj tzukno’jchak chi kij ri’.