Eri Departamento rech Investigación rech Delitos chi kech ri e Ak’alab’, e Ab’om xuquje’ e Alitom ri keniman ta tzij ri q’atb’al tzij, rech ri Wokajil Ajchajil Tinamit (DEIC-PNC), xkiya utzijol che ri e q’apojil ri’ xek’am b’i pa taq q’atb’al tzij rech ke’uchomaj ri e juk’al kajib’ (24) chi ab’om alitom rech kuq’at tzij pa kiwi rumal ri k’ax xkib’an pa nimatinamit.
Xuquje’ xb’ixik eri b’anoj k’ax are ruk’ reqaxik taq ri k’aqb’alil, eri uq’axexik ub’aq’ taq k’aqb’alil xuquje’ rech kab’an ri k’ax ruk’ ri’ nik’aj chik b’anoj itzelal.
K’ate ri’ eri reqa’lenel ri Delegación de Villa Nueva, Iximulew, pa uterenb’exik ri b’iw b’ixik loq rech keb’ b’ixik pa Alba Kenneth pa b’elejeb’ (9) q’ij rech abril rech pa junab’ ri’, are chi’ xeriqitajik e keb’ chi e q’apojil keqam jun k’aqb’alil maj uwujil ri’, are chi’ e b’enaq chi rij jun kejach’ich’ pa le colonia Santa Cruz, Pa uxukut le Prado I, Amatitlán, Iximulew.
Eri nik’aj q’apoj winaq ri’, k’o waqlajuj xuquje’ wuqlajuj kijunab’, e b’enaq kachib’il jun ala ali chi rij ri kejach’ich’ reqam ri placas M0817CJP, ri k’o uwujil ri’, keqam b’i jun mochila ruk’ jun k’aqb’al chi upam. Rumal ri’ eri keb’ q’apoj winaq ri’ xek’am b’i pa Q’atb’al Tzij rech Ke’uchomaj Ab’om Alitom ri keniman taj. Rumal ri’ eri alaj ali xk’am b’i pa le Nima Toq’in Ilon Q’atoj Tzij rech Amaq’.
Eri delegación rech ri DEIC rech Villa Nueva, ri kuchajij ri tinamit Amatitlán, xub’ij che ri pawe junab’ ri’ e k’o waqxaqib’ chi ab’om alitom elaq’omab’ kakitoq’ij pwaq, xeriqitajik xkib’an kamisanik, keqam k’aqb’al xuquje’ ruk’ xkib’an nik’aj chik b’anoj k’ax xechapatajik.