Eri nimaq’atenik ri awan kunab’alil xtaq ub’anik rumal ri Wokaj K’amal B’e Amaq’ pa reqe’len ri Ministerio rech Gobernación, are q’atenik ri’ xb’an pa le job’ q’ij ok’owinaq ri’. Rumal ri’ eri Ministro Francisco Jiménez sib’alaj xuya ub’ixik che pa wokajil ajchajil tinamit xkib’an ri q’atenik ri’ xuquje’ rumal ri’ k’o nim q’atenik awan kunab’alil xkiriq pa taq nimab’e pa tinamit ri’.
Rumal ri’ eri reqa’lenel ri Subdirección General rech Análisis rech Información Antinarcótica (SGAIA) rech ri Wokajil Ajchajil Tinamit (PNC) xkiriq jun nim eqa’n chi awan kunab’alil, pa jun nim kaxonach’ich’ pa Puerto Quetzal, Escuintla ri’. Eri kapanik k’o 1,300 chi pisoj rech awan kunab’alil.
Eri kaxonach’ich’ k’o pa le juyub’ ch’ich’ ub’i’ Del Monte Valiant, upetik loq Ecuador xuquje’ xok’ow loq pa Costa Rica. Pa le solinem ri’, eri tz’i’ eqa’lenel ub’i’ Jaguar are xkut’un chi kuwach ri juk’ulaj ajtzukunel kib’i’ b’inomio, rumal ri’ are chi xkiriq ri 34 eqa’n petinaq loq pa kajib’ nima’q kaxon k’olib’al.
Eri eqa’n awan kunab’al ri’ are kutun rib’ ri rajilab’a ruk’ ri xriq pa le wuqq’ij kanoq pa le nimab’e rech ri Atlántico ri, pa jun kaxonach’ich’. Eri rajilab’al ri awan kunab’al ri’ k’o Q85 millones rajil. Eri ajb’inisal ri ch’ich’ ri’ xk’amb’i pa q’atb’al tzij rech kaq’at ri tzijo pa uwi.
Xuquje’ pa wuqq’ij kanoq ri reqa’lenel ri PNC xkiporoj k’i taq raqan ichaj tiko’n rech marihuana ri’, pa Chuwi’meq’ina’ xuquje’ Chinab’jul, eri rajil are sib’alaj chom Q6 millones ri’.