Eri reqa’lenel ri Subdirección General rech Análisis rech Información Antinarcótica (SGAIA), rech ri Wokajil Ajchajil Tinamit (PNC), pa kemonchak kuk’ ri wokajil e ajchajil Amaq’ Iximulew ri’ xkib’an k’i taq tzukunem, rumal ri’ k’o k’i taq tiko’nib’al awan kunab’al xkiriqo pa taq ri k’ache’laj pa rulewal tinamit. Eri xriqik xporox ri’ eri rajil are Q13 millones 845 mil 625 ri’ are rajil ri awan kunab’alil xporoxik.
Eri puqtzukunem ri’ are xb’an pa le 22 rech abril pa le caserío San José Siguilá, rech Momostenango, Totonicapán, chi la’ k’ut eri wokaj ajchajil tinamit xkiporoj 29 mil 455 raqan ichaj tiko’n rech marihuana ri k’iyirinaq chik, eri rajil are Q11 millones 045 mil 625 ri’. Eri tiko’n ri’ are la’ xriqitaj pa kajib’ peraj juyub’ chi la’ k’ut.
Pa le puqchajinem xb’an pa le comunidad San Jacinto, Chahal, Alta Verapaz, xb’antaj kowonem xporox 280 mil chi tiko’n ichaj rech coca, eri rajil are Q2 millones 800 mil, jeri’ xb’antaj kowonem xporoxik jun ja awalik rech b’anob’al awan kunab’al. Ruk’ ri poronem ri’ xb’antaj kowonem xq’atexik kichuq’ab’ taq ri narcotráfico xuquje’ ruk’ wa’ kakub’isaxik ri chajinem winaqilal ri’.
Eri K’amal B’e rech Iximulew pa reqele’n ri Ministerio rech Gobernación (Mingob) kuk’ut ruk’ wa’ che qastzij b’a’ tajin kub’an ri q’atenik taq ri narcotráfico xuquje’ ri molaj b’anol k’ax pa taq nimatinamit, rech ya’ik uchuq’ab’ ri ya’olchajinem pa taq k’ulb’a’til rech ri qatinamit. —