Eri Wokom Taqawokajil rech Iximulew xuya’ pa utzijolil pa we q’ij miércoles 8 rech junio pa le Diario rech Centroamérica ri Decreto Gubernativo 2-2022, chi upam kub’ij wi pa jun ik’ kakojik ri Korlim Ya’olchajinem pa rulewal taq tinamit rech Ixchiguán xuquje’ Tajumulco, San Marcos, rumal ri b’anoj k’ax xb’antaj ri’, ri kuya’ itzelal pa ucholajil ya’olchajinem taqanik chi ke ri winaqilal rumal ri b’anoj k’ax ch’ojinik xb’an chi ke pa rulewal tinamit ri’ xuquje’ ri ch’ojinem katajin chi’.
Eri ministro rech Gobernación, David Napoleón Barrientos xub’ij: “Eri k’amal b’e Amaq’ Alejandro Giammattei kuk’ ri wokaj ministros xkichomaj rech xkoj ri korlim ya’olchajinem chi’ rech ke’ok pa taq ri tinamit ri’, che ri rajwaxik kakiq’el ri b’anoj k’ax rech utzilem kub’sib’al k’u’x chi ke ri winaqil, rumal k’ut xb’antaj ri k’ax pa tinamit kumal ri molaj e ajb’anol k’ax keqam k’aqb’alil ri kakib’an k’ax chi ke ri winaqil keriqitaj pa taq ri juyub’al ri’”.
“Pa jun komon tob’anem, eri wokaj ajchajinelab’ xkib’an k’i taq tzukunem pa taq ri tinamit ri’, rech kakiya’o pa ucholajil ri utz kik’aslemalil winaq, rech kub’sib’al ya’olchajinem chi kech ri e aj iximulew xuquje’ rech kak’oji pa ucholajil ri taqanem pa we Amaq’” xcha’ ri Barrientos.
E pa le uq’ijol upatanexik ri korlim ya’olchajinem tzukunik, are xtaq uq’atexik: maj jun chik xaq ta kewa’katik, rech kechap e b’anol k’ax, rech kak’otox kchi’ ri kechapik, rech man kakiriq ta chik kib’ ri winaq xuquje’ k’ot ri kakich’ojij, rech maj jun kareqaj k’aqb’al, rech kewa’kat ta chik winaq pa waqib’ kajb’al rech chaq’ab’ pa waqib’ kajb’al rech saqarib’al (18:00 a 06:00) rech pa jun chik q’ij.
Eri k’amal b’e Amaq’il are kupatanij rech kub’an nimataqanel ri Wokaj Amaq’ Iximulew rech kub’an taqanik pa keb’ tinamit ri’. Are wa’ ub’an pa le upatanil ri Ministerio rech ri Defensa Nacional (Mindef), pa komon chakunem ruk’ ri Ministerio rech Gobernación ri’ (Mingob).