Pa uterenb’exik utzukuxik ri jun ali xeleq’ax b’i pa Mixco ri’, eri rajtzukunelab’ ri Comando Antisecuestros rech México xuquje’ Iximulew ri’, rumal ri komonchak xkib’an ri’ xekowon che uriqik pa jun nimab’e rech Villahermosa-Escarcega, chi la’ pa le ranchería Medellín, pa Palenque, Chiapas ri’.
Eri ali xsach pa le 18 rech marzo kanoq pa Lo de Coy, zona 1 rech Mixco, are chi’, eri rajtzukunelab’ ri Comando Antisecuestros rech ri Wokajil Ajchajil Tinamit (PNC), xkich’ob’ k’ut che ri jun ali ri’ la’ pa México kariqitaj wiri’ rumal ri’ xkiya’ chi kuwach kuk’ ri q’atb’al tzij rech ri nimatinamit le’ xkitzukuj chi la’ k’ut.
Pa le b’anoj ri komonchak rumal ri Comando Antisecuestros ruk’ ri Ministerio Público ri’ ruk’ utob’anik ri Fiscalía Antisecuestros del Estado de Chiapas ri’, pa kak’al keb’ q’ij ri’ sib’alaj xkitzukuj uwach ri’, rumal ri’ xb’antaj kowonem xriqitaj ri jun ali ri’.
Eri q’atb’al tzij ri’ ketajin k’ut che b’anoj komonchak chi rij ri’ ruk’ ri Fiscalía Antisecuestros rech le tinamit ri’ rech kajach b’i ri ali pa kaq’ab’ ri utat nan ri’.
Rech k’u ri’ kajach pa le unidad rech Alerta Alba Kenneth rech San Benito, Petén ri’, rech kak’is uchomaxik ri’.