Eri k’isb’al q’atexik nimab’e xesax kumal ri Wokaj Ajchajil Tinamit pa Río Hondo, Zacapa, panik’aj nimaq’ab’, ruk’ wa’ xb’an ujamik uwach ri q’axenik pa taq ri nimab’e ri q’atim pa amaq’ tinamit.
Eri Wokaj Ajchajil Tinamit (PNC) uk’is retaxik ri q’ateb’al kojom pa taq ri nimab’e kumal ri winaq ajch’ojil, are wa’ xb’antaj kowonem ruk’ rumal taq ri puqchajinem rech xb’an umajik taq ri nimab’e rech ya’tal keq’axik ri winaqil pa tinamit.
Ri ministro rech Gobernación, Marco Antonio Villeda, xuya utzijol pa jun nimatzijolinik xb’an kimik, che pa ronojel ri nimab’e xjamataj pa 34 ri k’o pa tinamit, ri k’o chi la’ pa taq ri distritos Central, Sur, Oriente xuquje’ Norte. Sib ‘alaj xub’an utzijoxik che ri ujamik uwach taq ri nimab’e rech keq’axik ri winaq kachalal kib’, ri ajchak, ri b’insam ch’ich’ rech keq’ax pa aninaqil xuquje’ ri keqam wa tzuqub’al, kunb’al xuquje’ ri q’aq’elja’b’al.
“Panik’aj nimaq’ab’ xb’antaj kowonem xjamik uwach ronojel taq nimab’e rech jamal chik keq’ax konojel ri winaq pa amaq’.”
Ri jun chi ke ri nimab’e xjam uwach are ri k’o pa le kilómetro 124 rech le Nimab’e pa Atlántico, pa le rokib’al ri aldea La Arenera, Río Hondo, Zacapa, chi la’ k’ut eri PNC pa oxlajujn chi kajb’al ri’ xub’an ujamik ri q’axenik chi la’. Rumal ri’ eri Ministro xub’ij che ri k’isb’al ujamik ri nimab’e are xjam kumal ri ajchajil tinamit ri xtz’apixik pa le q’ij kanoq.
Ya’talil k’o pa amaq’il
Eri Ministro Villeda, rachi’l ri q’atb’al tzij rech ri Defensa Nacional, a Henry Sáenz, xub’an ub’ixik, ucholajil ri puqchajinem xb’anik rech xunimaxik ri xtaq loq ub’anik ri Corte rech Constitucionalidad ri’, rech resaxik taq ri q’ateb’al niamb’e ri’, ruk’ pa nimab’al ri ya’talil chi ke ri winaqil xuquje’ pa suk’ilal.
“Kinya’o nim uq’ijol ri nimachak xkib’an chi jujunal taq ri rajchajinelab’ (ri PNC), kumal ri taqanelab’ ruk’ kichakub’al pa amaq’el xek’oji pa kulewal taq tinamit, xuya uq’ij ri tzijob’enem xkib’ano rech pa jikom suk’ilal xech’aw’ kuk’ ri winaqilal are chi’ sib’alaj k’o ri xkich’o’jij.
Eri q’atb’al tzij rech Gobernación xuquje’ xuya uq’ij ri chak xb’an kuk’ ri Wokaj Ajchajil Amaq’ Iximulew, eri kitob’anik k’o nim upatan xub’an pa le jamik uwach taq ri nimab’e xuquje’ rech pa jikom kub’al k’u’x keq’axik ri winaqilal pa k’isb’al wuqq’ij petinaq ri’ rech naj q’ij ke’uxlan pa le nimaq’ij ri amaq’ tinamit.