Xb’an ri uwuq wuqq’ij ub’i’ “Semana Mundial rech ri Seguridad Vial 2023” ruk’ le Tzij “Repensar la Movilidad” xb’an pa lunes 15 k’a pa le 21 rech mayo ri’. Ri uq’ijol ub’anik rech toq’inik b’anoj wa’katem che kaqan ri winaq, chi rij b’aqch’ich’ xuquje’ pa ch’ich’ ke’uk’am b’i winaq; jeri’ xya ub’ixik che rajwaxik eri winaqil ma utz taj kakirumumij kib’ pa le kich’ich’ rech kakiriq k’ax pa taq nimab’e rumal ri’.
Rumal k’u ri’, eri Taqanel rech ri Departamento rech Tránsito rech ri Wokajil Ajchajil Tinamit (PNC) xub’ij che ri puqchajinem tzukunik pa taq uxo’l ja pa tinamit, pa utzal b’e xuquje’ pa taq nimab’e pa rulewal tinamit, are rech la’ kaq’atexik kakiriq ta k’ax ri kakib’inisaj ri ch’ich’ pa taq nimab’e ri’. Rumal ri’ k’o k’uttijonem kakib’an chi rij seguridad vial rech ya’tal chi kech ri ajtijonelab’, xcha’.
Rumal ri’ eri Viceministra rech Educación Extraescolar xuquje’ Alternativa rech ri Taqawokajil rech Tijonem (Mineduc) xub’ij, eri k’uttijonem chi kech ri ajtijonelab’ rech nab’e, ukab’ xuquje’ urox q’attijonem are la’ kub’an chi kech ri ajtijoxel rech kak’amansaj kib’ rech keniman Tzij chi rij educación vial pa taq rachoch tijob’al rech pa rulewal tinamit.
Chi keb’ taq junab’ ri’ eri Organización Mundial rech ri Utzwachil (OMS) ruk’ taq ri Comisiones Regionales rech ri Asamblea General rech ri Organización rech ri Naciones Unidas (ONU) xkib’an ri choman cholchaik xuquje’ xkiwok uwach ri Semanas Mundiales rech Seguridad Vial, xkib’an ri chomanik ri’ xuquje’ xkiya utzijolixik ri Tzij pa uwachwuj pa kaqiq’ chi rij uq’atexik ri riqonem k’ax rech e k’ot chik winaq kekam pa taq nimab’e rumal kakisolkopij kib’ ri’.
Chajinem pa taq nimab’e
Pa taq ri k’olib’al ch’ich’ taji kesolix ri ajb’inisal ch’ich’ rech kilik we keqam kiwujilal, rech kilik we man k’ot tzam kitijom, rech kilik we man kakiya ta uwi kakirumumij kib’; rech kilik we kikojom yach’ib’al kipam pa le ch’ich’, rech kilik we man kech’aw taj pa ch’aweb’al, rech kilik we kakinimaj retal k’utb’al pa nimab’e xuquje’ we kakinimaj ri Taqanem rech Tránsito ri’.
Xuquje’ rech kilik we man k’ot winaq ri’ taqom kichapik, we man k’ot jastaq awan kunab’al keqam b’i ri are kakojik rech kakib’an k’ax chi kech ri winaqil. Tajin k’ut kichapik ri ch’ich’, ri kejach’ich’, ri ch’ich’ rech ajb’inisaxel xuquje’ ri alilaq taq ch’ich’ we man k’ot e eleq’am b’i ri’.