Eri Departamento rech Tránsito rech ri Wokajil Ajchajin Tinamit (PNC), xkiya ub’ixik che kamik kab’an upatanexik ri Cholchajinem pa taq Nimab’e pa “Le Awas Q’ij 2024”, pa taq ri nimab’e rech pa qatinamit.
Ruk’ wari’ are kab’anik ri chajinem pa taq ri nimab’e rech pa kub’al k’u’x kewa’katik ri winaqilal pa taq ri nimab’e, xcha’ ri a Jonathan Hernández, Rajtaqonel ri DT-PNC ri’.
“Nab’e ri’ are xb’an jun utz’ib’axik utzijol chi rij ri nimak’ax riqom pa taq ri nimab’e, rumal ri’ xub’an jun nim kasik’ixik ri winaqil kakib’inisaj ri kich’ich’ rech pa rutzil kuwach chakib’inisaj b’a’ ri kich’ich’ xuquje’ makitij tzam we e b’enaq pa taq nimab’e, xaq makititz’o b’i winaq jastaq chi rij taq kikejach’ich’ xuquje’ pa taq kich’ich’”, xcha’-
Eri Harold Reyes, Rajtaqanel ri Planificación rech ri DT-PNC, xub’ij ch eri nimab’e qas chajim kumal ri ajchajil tinamit are ri’: pa le CA-09 Sur Autopista-Escuintla ri’, pa le Puerto Quetzal ri’; pa le CA-01 Occidente ri’; pa le CA-09 Norte kab’e pa Atlántico ri’ xuquje’ pa le CA-01 Oriente Nimab’e kab’e pa El Salvador ri’. Rumal k’u ri’ kakoj k’olib’al chajinem pa taq ri nimab’e rech kechajixik we utz kuwach, we keqam kiwujilal ri e ajb’inisal ch’ich’ e b’enaq pa taq nimab’e, xcha’ri ri Reyes.
Eri rajchajinelab’ ri Tránsito, kakilo we jarinaq taq kaqan ri ch’ich’ e b’inisam, we k’o tzijb’al t’iqb’al kib’e kojom, we utz ri’ xuquje’ we man kakirumumij taq kib’ keb’inisax ri ch’ich’ ri’. Rumal ri’ kek’oji che chajinem pa taq ri nimab’e chi paq’ij chi chaq’ab’ ri’, e 440 chi rajchajinel ri Tránsito kek’oji che chajinem pa taq ri nimab’e.
Eri ajpatan taqanelab’ xkib’ij eri Cholchajinem are kamajtaj uloq pa le 11 rech marzo xuquje’ kak’is ub’anik pa le nab’e q’ij rech abril xuquje’ are la’ kaya na utzijolil ri ub’antajil ri chajinem ri’.