Rumal k’ut sib’alaj katajin raq’anik uchuq’ab’ ri jun itzel yab’il rech ri Coronavirus COVID-19 pa we amaq’ xchomataj k’ut xtaq ub’ixik che maj jun winaq chik kopan pa ch’ab’enik pa taq le 22 chi japache’ tz’apib’al rech pa amaq’ ri’ xcha’ ri uk’amol ub’e ri Japache’ Tz’apib’al, (SP) Luis Escobar.
Eri ajk’amol b’e ri’ xutzijon chi rij ri k’ax k’o pa le Awas Q’ij, rumal k’ut eri kachalal ri e tz’apil pache’ ri’ xek’oji pa taq k’i riqoj kib’ winaqil ri’ eri qas k’ax ri’ qaraj keqam ri itzel yab’il rech kakitzij ri kachalal e k’o pache’ tz’apib’al ri’ rumal ri’ are rajwaxik kaqana’tij ub’ixik che pa le nab’e mul xub’an ri jun itzel yab’il ri’ e k’o 360 chi winaqil e ajpache’ xeyab’inik xuquje’ we kamik man k’ot jun e tzijom rumal ri jun itzel yab’il, man xaq ta ri’ ketzijtaj che yab’il ri e ajpache’ xane’ xuquje’ metzij taj ri’ ri rajchajinel ruk’ juntir ri kechakun pa japache’ ri’.
“Rumal ri’ eri uj sib’alaj kaqab’ij chi kech ri winaqil chakiq’i’ b’a’ jub’ik xuquje’ chakib’ij chi ke ri kachalal xuquje’ ri e tz’apilik rech chakiq’i’ ri pa ka’mul rok’owik ri jun yab’il ri’ xuquje’ xaq mikib’ij itzelal tzij xuquje’ mikib’ano ch’a’ojinik ri’ rumal k’ut are wa’ ke’uya pa k’ax kamikal ri kachalal e tz’apil pache’”, xcha’ ri Escobar.
We kamik xchomaxik rech k’o ajch’ab’enel ke’ok pa japache’ ri’ nab’e na qas kakunax kasaqb’isax ri’, eri e ajch’ab’enel ri’ ke’ok ri’ k’a pa 21 q’ij ri’ rumal k’ut petinaq chik ri awas q’ij, kak’ow na jun wuqq’ij rech kakikol kib’ le winaq rech kakitzij ta kib’ ri kachalal che ri jun itzel ya’b’il ri’, rumal qaraj e k’o xeb’e chi uchi’ nimaplo ri’, xcha’ ri K’amal b’e Japache’ ri’.
Qeta’m k’ut eri e ajpache’ ri’ ya’tal chi kech rech kopan kach’ab’exik kumal ri kachalal, are wa’ qas k’o upatanib’al chi kech, eri e rajawtzij pa le Japache’ e ke’ilowik rech kab’an utzilem chi rech kik’aslemal rech utz kek’oji ri e ajpache’ ri’”, xcha’ ri K’amal b’e ri’.