Eri Alexander Pérez Cano are xkoj che k’ak’ Inspector General rech ri Wokajil Ajchajin Tinamit (PNC). Ruk’ kakojik ri k’ak’ ajtaqanelab’ ri’ are rech kaya nim uchuq’ab’ ri uchak le taqawokajil pa b’anik utzilem chi ke ri winaqilal e’aj iximulew xuquje’ le chajinem pa amaq’ tinamit.
Eri a Pérez Cano xkoj che reqale’n rumal ri k’amal b’e ajchajin tinamit, David Custodio Boteo, pa le Dirección General rech ri PNC. Pa le yab’al eqale’n ri’ are jun xk’oji ri k’amal b’e ri’, Héctor Prera, ri xub’ij utz xkoj ri k’ak’ inspector.
Eri ajtaqo’nielab’ wokaj ajchajin tinamt e’are xkib’ij che ri k’ak’ inspector general ri’ rajawaxik are kuk’am b’e tzijob’elil, ruk’ ronojel ranima’ rech kub’an jun nimachak rech kuterne’j ub’anik ri jun utzilaj k’olem kumal taq ri winaqilal.
Eri Pérez Cano are xkoj che reqale’n ri’ rech pa chajin winaqilal, rech pa unimaxik ri ya’talil chi ke ri winaqilal xuquje’ rech k’o pa ucholajil ub’anik ri choltaqanik tzij pa amaq’ tinamit. Xya’taj ri reqale’n ri’ rumal k’o jun utzilaj uchak uk’aslemam uchal ub’anom pa le wokaj chajin tinamit.